«Ózenmunaıgaz» basqarmasynyń kásipodaq tóraǵasy Qýanysh Mamaev sottaldy

Jańaózen qalalyq soty «Ózenmunaıgaz» AQ №2 Skvajınalarǵa qyzmet kórsetý basqarmasynyń kásipodaq tóraǵasy Qýanysh Mamaevqa úkim shyǵardy, dep habarlaıdy Kazinform.

«Ol «Ózenmunaıgaz» AQ №2 Skvajınalarǵa qyzmet kórsetý basqarmasynyń kólik júrgizýshisin qyzmetten bosatpaı, slesar qyzmetine aýystyrý úshin laýazymdy adamdarǵa aqsha beremin degen jeleýmen 1,5 mln teńge kóleminde para alǵany úshin aıyptaldy», – dedi QR Sybaılas jemqorlyqqa qarsy is-qımyl agenttigi Mańǵystaý oblysy boıynsha departamentiniń basshysy Shamuraıt Shamenov.

Sot sheshimimen Q.Mamaevqa 30 mln teńge sommasynda aıyppul túrindegi jaza taǵaıyndaldy. Sondaı-aq ol memlekettik qyzmette, jergilikti ózin-ózi basqarý organdarynda laýazym atqarý quqyǵynan ómir boıyna aıyryldy.

Úkim zańdy kúshine endi.