«Ózenmunaıgaz» AQ jáne merdiger uıymdardaǵy zańbuzýshylyqtardy anyqtaý jalǵasady
Túngi tekseris kezinde personaldyń jumys oryndarynda bolmaýy, túngi aýysym kezinde eńbek mindetterin oryndamaýy, qoldan jasalyp, qurastyrylǵan quraldar men materıaldardy, onyń ishinde órt qaýpi bar ýchaskelerde paıdalanǵan jaǵdaılar anyqtaldy. Sondaı-aq, tabelde jumys istegen ýaqytyn asyra kórsetken faktiler belgili boldy.
Talap etilgen ýaqytta jumys ornyna múldem kelmegen adamdardy jumysqa ornalastyrý boıynsha eki jaǵdaı tirkeldi.
Qyzmetker naqty bir salanyń mamany retinde jumysqa alynyp, bir aıdan keıin basqa qyzmetke aýysqan jaǵdaılar bar. Mysaly, byltyr jumys izdeýshi kompanııaǵa 3-razrıadty elektr gazben dánekerleýshi retinde qabyldanyp, bir aıdan keıin 5-razrıadty ekskovator mashınısi qyzmetine aýystyrylǵan. Onyń ústine qyzmetkerdiń taǵylymdama kezindegi kartasynda «ótpedi» degen baǵa tur.
Sondaı-aq, tekseris qorytyndysy boıynsha 2019-2021 jyldardaǵy qubyrlar men qubyr ónimderi boıynsha derekterde sáıkessizdik anyqtaldy. Atap aıtqanda, arnaıy baǵdarlamada esepke alý men tirkeýde derekterdiń sáıkes kelmeýi baıqaldy. Al bul óz kezeginde derekterdi manıpýlıatsııalaýǵa jol ashýy múmkin. Sorǵy-kompressorlyq qubyrlar men shtanga jetkizýshilerden tonnamen qabyldanady, al olardy óndiriske aýystyrǵan kezde ólshem birligi danaǵa aýystyrylady, bul keıin ónimniń naqty paıdalanylǵanyn tekserýdi aıtarlyqtaı qıyndatady.
Budan basqa, ÓMG-niń munaı uńǵyma qubyrlaryn paıdalaný/ qyzmet etý merzimin 7 jyldan 2,5 jylǵa deıin tómendetý negizdemesi qosymsha tekseriletin bolady.
«2022 jyldyń 31 jeltoqsanyndaǵy jaǵdaı boıynsha 26 mlrd teńgege paıdalanylǵan munaı uńǵý qubyrlarynyń jınaqtalyp qalýy suraq týǵyzady. Olardyń jınalý jáne metall synyqtarynyń ýaqtyly ótkizilmeý sebepteri anyqtalyp, tolyq tekseris aıaqtalǵan kezde tıisti qorytyndylar jasalatyn bolady»,-delingen habarlamada.
