Ózenge káriz sýyn aǵyzǵan almatylyqqa aıyppul salyndy
ALMATY. QazAqparat- Ózen arnasyna káriz sýyn aǵyzǵan almatylyqqa aıyppul salyndy, dep habarlaıdy QazAqparat tilshisi.
Quqyq buzýshy Jarbulaq (Kazachka) ózenine sarqyn sýdy zańsyz aǵyzýdy anyqtaý úshin ótkizilgen reıd kezinde ustaldy.
«Jergilikti turǵyn A. esimdi turǵyn syrttaǵy dárethananyń káriz sýyn osy ózenge aǵyzdy. Bul áreketi úshin ol QR ÁQbK-niń 505-baby boıynsha ákimshilik jaýapkershilikke tartyldy», - dedi Almaty qalalyq PD Jergilikti polıtsııa qyzmeti basqarmasynyń bastyǵy Manap Sattarov.
Onyń aıtýynsha, reıdtiń maqsaty - Jarbulaq ózeniniń lastaný kózderin anyqtaý jáne quqyq buzýshylyqtar anyqtalǵan kezde, olardy joıý bolyp tabylady.
Aıta keteıik, bul is-shara Almaty qalasy Ekologııa departamenti, Medeý aýdandyq ekologııalyq polıtsııasy, Medeý aýdany ákiminiń apparaty, «Qazgıdromet» RMK, Almaty qalasy Sanıtarlyq-epıdemıologııalyq baqylaý departamenti, Balqash-Alakól basseındik sý qoryn retteý men qorǵaý ınspektsııasy jáne Almatydaǵy azamattyq qoǵam ókilderi birlesip ótkizdi.
