Ózenge aǵyp ketken júkti áıel oqıǵasy: TJK túsinik berdi
ALMATY. QazAqparat - QR ІІM TJK resmı ókili Rýslan Imanqulov sýǵa aǵyp ketken 32 jastaǵy kelinshekti izdestirý sharalary týraly aıtty, dep habarlaıdy QazAqparat tilshisi.
Qazir súńgýirler oqıǵa bolǵan jerden 15 shaqyrym qashyq jerdi tintip jatyr. Alaıda ózenniń qatty aǵysy izdeý sharalaryna kedergi keltirýde.
«Ózen aǵysy birqalypty emes, súńgýirler úshin de úlken qaýip týyp otyr. Olar ınstrýktsııaǵa qaraı jumys jasap jatyr. Ózende súńgý jumystarynyń óz normatıvteri bar. Aǵys kúsheıgen kezde súńgýirler aǵys báseńdegenshe sý túbinen shyǵyp kúte turady. Sodan soń qaıta jalǵastyrady. Óıtkeni bul olar úshin de qaýipti», - dedi Rýslan Imanqulov.
Tótenshe jaǵdaı qyzmetiniń ókili turǵyndardyń jaýapsyzdyǵy týraly da aıtyp ótti.
«Osyndaı jaýapsyz áreketterge baratyn adamdar týraly da basa aıtqymyz keledi. Bul jer kilem jýýǵa arnalmaǵan aımaq. Adamdar tyıym salynǵan jerge barmaýy tıis», - dedi ol.
Maman qazirgi tańda kanaldyń sýyn burýǵa bolmaıtyndyǵyn aıtty.
«Sýdy bógeýge bolmaıdy. Sý burylatyn bolsa, basqa jerlerdi sý basý qaýpi týady. Jaqyn arada turatyn halyqtyń ómirine qater týady. Sý arnasyn jabýdy quzyrly organdar, ıaǵnı jergilikti ákimdikter sheshim qabyldaýy kerek», - dedi R.Imanqulov.
Eske salsaq, 32 jastaǵy Ásııa Musaeva Úlken Almaty kanalyna kilem jýýǵa barǵanda aıaǵy taıyp ózenge aǵyp ketkendigi týraly jazǵan bolatynbyz. Sondaı-aq, osyǵan uqsas qaıǵyly oqıǵa Astanada qalasynda da bolǵan edi. 43 jastaǵy áıel eki qyzymen birge sýǵa ketip, kóz jumǵan bolatyn. Olar Nura-Esil arnasynyń jaǵasynda kilem jýǵan.
