Ózen-Túrikmenstannyń memlekettik shekarasy temirjolynda qozǵalysty iske qosýǵa daıyndyq talqylandy
ASTANA. 18 tamyz. QazAqparat - QR Kólik jáne kommýnıkatsııa mınıstrligi Kólik jáne qatynas komıtetinde Ózen-Túrikmenstannyń memlekettik shekarasy temirjolynda qozǵalysty iske qosýǵa daıyndalý máselelerine arnalǵan jınalys ótti.
Oǵan QR Syrtqy ister, Mádenıet mınıstrlikteriniń jáne «Qazaqstan temir joly» ulttyq kompanııasy» AQ-nyń ókilderi qatysty, dep habarlady Kólik jáne kommýnıkatsııa mınıstrliginiń baspasóz qyzmetinen.
Atalǵan joba Ózen (Qazaqstan) - Qyzylqııa - Bereket - Ertrek (Túrikmenstan) - Gorgan (Iran) temirjolynyń bir bóligi bolyp tabylady jáne Qazaqstan, Túrikmenstan, Iran Úkimetteri arasyndaǵy kelisim negizinde iske asyrylýda. Kelisim boıynsha qurylysty bir ýaqytta 2011 jylǵy jeltoqsanda aıaqtaý kózdelgen. Alqaly jıyn barysynda basty talqylanǵan másele retinde qozǵalysty saltanatty jaǵdaıda iske qosý orny men ótkizý merzimin anyqtaý jaıy qaraldy.
Qurylys barysynyń belsendi qarqyny men qazirgi kezde abattandyrý jumystarynyń júrgizilýi temirjoldyń qazaqstandyq ýchaskesindegi nysandy aǵymdaǵy jyldyń qazan aıynda tapsyrýǵa múmkindik beredi.
Qazirgi tańda dıplomatııalyq arnalar arqyly túrikmen tarapymen poıyzdar qozǵalysyn bir ýaqytta ashý máselesi talqylanýda.
