Ózen shaıandaryn shekara asyrmaq bolǵan reseılik azamat quryqtaldy
ORAL. QazAqparat - 1 qazan kúni tańerteń Oral-Orynbor joly boıynda kedendik baqylaý kezinde RF Saratov qalasynyń turǵyny mingen avtokólik toqtatyldy.
BQO ishki ister departamentiniń baspasóz qyzmetinen túsken málimetke qaraǵanda, 1983 jylǵy júrgizýshi ózennen zańsyz aýlanǵan 1697 dana ózen shaıanymen ustaldy. Ol shaıandy tıisti qujatsyz Qazaqstannan Reseıge alyp bara jatqan bolyp shyqty.
Qazirgi kezde qylmystyq is qozǵalyp, tergeý amaldary júrgizilýde.
Óńirde mal urlyǵy da jıiledi. Atap aıtqanda, Zelenov aýdandyq ishki ister bólimi qyzmetkerleri birneshe qylmystyń betin ashty. Bıylǵy mamyr men qyrkúıek aralyǵynda Beloglınka eldi mekeni mańynan 1975 jylǵy azamatqa tıesili 11 bas ýaq jandyq erkin jaıylymnan urlanǵan. Jedel izdestirý sharalary barysynda Mahambet aýylynyń 1982 jylǵy turǵyny kúdikti retinde qolǵa tústi. Atalǵan derek boıynsha QR QK 188-baby 1-bóligine sáıkes qylmystyq is qozǵaldy. Tergeý barysynda kúdiktiniń taǵy bir qylmysqa qatysy bary belgili boldy. Ol 1961 jáne 1964 jylǵy azamattarmen aldyn ala sóz baılasyp, bıylǵy maýsym aıynda bir sharýa qojalyǵyna tıesili taǵy eki qoıdy bókterip ketken. Bul derek boıynsha da QR QK 188-baby 2-bóligine sáıkes tergeý júrgizilýde.
