«Ózen kólik qurastyrý zaýyty» basshysy úleskerlerdiń 303 mln teńgesin ıemdengeni anyqtaldy

AQTAÝ. KAZINFORM — QMA Mańǵystaý oblysy boıynsha departamenti «Ózen kólik qurastyrý zaýyty» JShS basshylyǵyna qatysty azamattardyń qarajatyn úleskerlik qurylys retinde zańsyz tartý faktisi boıynsha tergeýdi aıaqtady. 

— Eki jyl boıy kompanııa basshylyǵy Jańaózen qalasynda «Astana Rich Village» turǵyn úı kesheniniń qurylysyn qajetti ruqsat qujattarynsyz, jobalyq-smetalyq qujattamasyz, memlekettik saraptama men avtorlyq qadaǵalaýsyz júrgizgen, — delingen habarlamada.

Azamattardyń qarajatyn tartý maqsatynda túrli ınternet-resýrstarda páterlerdiń naryqtan tómen baǵamen satylatyny týraly jarnama ornalastyrylǵan.

— Nátıjesinde 23 azamatpen jalǵan aldyn-ala satyp alý-satý sharttary jasalǵan. Zańsyz tartylǵan qarajattyń jalpy kólemi 303 mln teńgeden asty.

Túsken aqsha qurylys materıaldaryn satyp alǵandaı kórinis jasap, kásiporyn kassasynan qolma-qol aqshaǵa aınaldyrylyp, shyn máninde jeke qajettilikterge jumsalǵan. Turǵyn úı qurylysy aıaqtalmaǵan, — delingen QMA habarlamasynda.

Zalaldy óteý jáne jábirlenýshi úleskerlerdiń múddelerin qorǵaý maqsatynda sot sanktsııasymen kúdiktilerge tıesili múlikke — turǵyn úı, páter, 2 avtokólik jáne 3 jer ýchaskesine tyıym salyndy.

Kúdiktilerdiń biri qamaýǵa alyndy, ekinshisine bultartpaý sharasy retinde kepil qoldanyldy.

QPK-niń 201-babyna sáıkes ózge aqparat jarııalaýǵa jatpaıdy.

Aıta ketelik úlesker qurylys nysanynyń kepildigi baryn bank qosymshasy arqyly teksere alady.