Ózen-kólde, kanalda, fontanda bala ólimi jıiledi — Úkimet shara qoldanýdy tapsyrdy
ASTANA. KAZINFORM — Sýǵa shomylý maýsymy bastalǵaly kámeletke tolmaǵan 20 bala sýda qaza tapty. QR Premer-Mınıstri Oljas Bektenov shomylý maýsymynda balalardyń qaýipsizdigine basa mán berýdi tapsyrdy.
«Jyl ótken saıyn respýblıkanyń sý aıdyndarynda sýǵa ketken adamdar sany azaımaı tur. Bul shamamen 200-300 adam. Olardyń ishinde júzge jýyq bala bar. Ókinishke oraı, bıyl da bul kórsetkish tómendemeı tur. Jaz mezgili endi bastaldy. Sý aıdyndarynda qaıtys bolǵan adamdar, ásirese balalar sany ósýde», — dedi O. Bektenov búgingi Úkimet otyrysynda.
Máselen, sýǵa shomylý maýsymy bastalǵaly kámeletke tolmaǵan 20 bala sýda qaza tapty. Ótken aptanyń ózinde elordada ózendi júzip ótemin degen jasóspirim qaza tapty.
Qyzylordada balalardy qorǵaý kúninde birden eki bala sýǵa ketken. Túrkistan oblysynda sýarý kanalynda eki bala kóz jumdy. Kaspıı teńizinde qaraýsyz qalǵan eki jasar bala sýǵa batyp ketti.
«Mundaı faktiler kún saıyn tirkelip jatyr. Tipti Tótenshe jaǵdaılar mınıstrliginiń búgingi aqparynda da sýǵa batyp ketkender bar. Óńirlerdiń ákimdikteri osy baǵyttaǵy profılaktıkalyq jumysty kúsheıtkeni jón. Júretin patrýl sanyn kóbeıtý qajet. Polıtsııa TJM balalardyń sý aıdyny mańynda qaraýsyz júrý faktileriniń jolyn kesýi kerek», — dedi Úkimet basshysy.
Negizinen adamdar sýǵa túsýge arnalmaǵan ýchaskelerde sýǵa ketip jatady. Qazirgi ýaqytta el boıynsha sýǵa túsýge arnalǵan 708 oryn belgilengen.
Bul jumys Almaty, Aqmola, Qaraǵandy oblystarynda belsendi júrip jatyr.
Sondaı-aq, demalys oryndary 10-nan aspaıtyn Qyzylorda, Jetisý, Abaı jáne Ulytaý oblystarynda osy baǵyttaǵy jumysty jandandyrý qajet. Bul jumysty batys jáne soltústik óńirlerdiń ákimdikteri de belsendi júrgizý kerek.
«Bıyl Qazgıdromet, ásirese eldiń batysynda, shyǵysynda jáne ońtústiginde jazdyń ystyq bolatynyn boljap otyr. Osyǵan oraı, ózender men kólderde demalýshylar sany artady dep kútilýde. Buǵan daıyn bolý kerek. TJM jergilikti atqarýshy organdarmen birlesip mobıldik beketter sanyn ulǵaıtýy qajet», — dedi Premer.
Sý aıdyndarynnyń mańynda ornalasqan balalar lagerlerine erekshe nazar aýdarý kerek. Oqý-aǵartý mınıstrligi ákimdiktermen birlesip balalardyń jazǵy kezeńdegi qaýipsiz demalysyn qamtamasyz etý jóninde sharalar qabyldaýy kerek.
Ekinshiden, ońtústik aımaqtardaǵy sýarý kanaldary da adamdarǵa qaýip tóndiredi. Kanalardar men aryqtardyń kópshiliginde qorshaý joq.
«Ásirese, balalardyń kanaldarda qaza bolý jaǵdaılary Almaty, Jambyl, Qyzylorda jáne Túrkistan oblystarynda kóp tirkelip otyr. Osyǵan baılanysty ákimdikter kanaldar men aryqtarda qaýipsizdikti qamtamasyz etý máselesin sheshý tıis. Ótken jyly Pavlodar oblysynda sýburqaqta shomylyp júrgen balany elektr togy soqty. Árıne, sýburqaqta shomylýǵa tyıym salynǵan. Bul týraly sanıtarııalyq dárigerler únemi eskertip keledi. Buǵan qaramastan, balalar sýburqaqqa shomylýǵa barady. Muny Astanada, Almatyda, basqa qalalarda da baıqaýǵa bolady. Barlyq ákimdikter sýburqaqtardyń qaýipsiz jumysyn tekserip, sondaı-aq baqylaýdy kúsheıtip, balalardyń shomylýyna jol bermeýi tıis», — dedi Oljas Bektenov.
