Ózen arnasyn buzyp, taýdy tegistep tastaǵan kásipker 1000 dollar berip jazadan qutylyp ketti — Erlan Saırov
ASTANA. KAZINFORM — Májilis depýtaty Erlan Saırov jer qoınaýyn paıdalanýdy retteýge arnalǵan jańa normaǵa qarsylyq bildirdi.
— Zań jobasynyń 194-babynyń 5-tarmaǵynda 1000 tekshe metr topyraqty barlaý maqsatymen qozǵaý ókiletti organnyń ruqsatymen jasalatyny aıtylǵan. 1000 tekshe metr topyraq degenimiz 70 tonnalyq 20 vagonǵa sııatyn kólem. 20 vagonnyń ishinde qansha altyn bolatynyn ózińiz bilesiz be? Sonda qazir biz osy zańnyń astynda barlaý syltaýymen zańsyz altyn óndirýshilerge stımýl jasap otyrmyz. Men sizge jalǵyz mysal keltireıin, Shyǵys Qazaqstan oblysynyń Marqakól, Kúrshim, Úlken Naryn, Samar, Zaısan Tarbaǵataı aýdandarynyń taýly aýmaqtary túgel qazylyp tastalǵan. Ony ózderińiz bilesizder. Barlaýǵa lıtsenzııa alady da, sol altyndy zańsyz óndiredi. Memleket qanshama zııan shegip jatyr?! Endi zańsyz óndirýdi ózderińiz zańdastyryp bergeli otyrsyzdar. Osydan 4 jyl buryn Marqakól aýdanynda taý ústindegi Qaljyr ózenine barlaý jasaımyz dep, búkil ózen arnasyn buzyp, taý silemderin tegistep tastaǵan. Sol adam 1000 dollar berip qutylyp ketti. Sonda osy sııaqty myńdaǵan adamdy qalaı baqylaısyzdar, — dedi depýtat.
Ónerkásip jáne qurylys mınıstriniń orynbasary Iran Sharhan jańa norma kerisinshe barlaý syltaýymen zańsyz ken ıgeretinderge tosqaýyl bolady degen ýáj aıtty.
— Bul norma qoldanystaǵy kodekste de bar. Biz endi ókiletti organnyń ruqsat berý tártibin naqtylap qana otyrmyz. 1000 tekshe metr degendi aıtyp otyrsyz. Iá, biz osylaı ruqsat beremiz. Qoldanystaǵy kodekste satý máselesi naqtylanbaǵan. Biz usynyp otyrǵan normada barlaý úshin qazylǵan topyraqty satýǵa tyıym salynady. Jer qoınaýyn paıdalanýshy, barlaý jasap jatqan ınvestor osy 1000 tekshe metr kóleminde topyraqty metallýrgııalyq tehnologııany anyqtaý úshin ǵana ıgeredi. Biraq odan túsken qazbany sata almaıdy. Aıtyp otyrǵanyńyz óte durys. Qazir kóp ınvestor barlaý lıtsenzııasyn alyp, jasyryn óndirip jatyr. Siz aıtqan Shyǵys Qazaqstan oblysynda birneshe ret boldym. Bıyl ShQO-da zańsyz óndirýdiń 5 faktisin anyqtap, quqyq qorǵaý organdaryna berdik. Bul kerisinshe zańsyz óńdeý jumystaryn joıady, — dedi Iran Sharhan.
Buǵan deıin jyl basynan beri jer qoınaýyn paıdalanýshylarmen 17 kelisimshart buzylǵanyn jazǵan edik.