Ózekti baǵyttar boıynsha granttardy josparlaýdyń jańa formaty engizilmek

NUR-SULTAN. QazAqparat – Búgin Májilistiń jalpy otyrysynda tıisti zań jobasyn talqalaý kezinde QR Aqparat jáne qoǵamdyq damý vıtse-mınıstri Bolat Tilepov úkimettik emes uıymdardy (ÚEU) memlekettik qoldaý tetikterin damytýǵa qatysty túsinik berdi, dep habarlaıdy QazAqparat tilshisi.

Palatanyń jalpy otyrysynda «Qazaqstan Respýblıkasynyń keıbir zańnamalyq aktilerine volonterlik qyzmet, qaıyrymdylyq, memlekettik áleýmettik tapsyrys jáne úkimettik emes uıymdarǵa arnalǵan granttar máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.

Zańnamany jetildirý aıasynda granttyq qarjylandyrý júıesin qaıta formattaý jáne ÚEU-men ózara is-qımyldyń jańa tetigi - strategııalyq áriptestikti engizý usynylady.

«Granttyq qarjylandyrýǵa qatysty toqtalsaq, granttar júıesiniń gradatsııalanǵan negizde kelesi túrlerin engizý kózdeledi: qysqa merzimdi, orta merzimdi jáne uzaq merzimdi jobalar. Bul rette, granttyń túrine qaraı qarjylandyrý kólemi, merzimi, ÚEU-nyń konkýrsqa qatysý sharttary jáne eseptilikke qatysty talaptar aıqyndalady. Sóz joq, bul tásil granttyq qarjylandyrý rásimderin jeńildetedi», - dedi B. Tilepov.

Ekinshiden, ózekti baǵyttar boıynsha granttardy josparlaýdyń jańa formatyn engizý kózdelgen. Bul granttardy halyqtyń qajettilikterine tikeleı baǵyttaıdy. Atalmysh tetik «tómennen joǵaryǵa» tásilin engizýge múmkindik beredi. ıAǵnı, ÚEU-lar óz jobalary arqyly qoǵamdaǵy ózekti máselelerge shuǵyl den qoıyp, sheshimderdi ýaqytyly qabyldaıdy.

«Úshinshiden, granttyq saıasattyń salalyq tásilin keńeıtý úshin ortalyq memlekettik organdarǵa operator arqyly granttar usynýǵa quzyretter beriledi. Tórtinshiden, granttardyń tıimdiligin baǵalaý tetigin engizý kózdelgen. Bul úkimettik emes uıymdardyń qyzmet sapasyn anyqtaýǵa, bıýdjettik shyǵyndardyń tıimdiligin qadaǵalaýǵa jáne granttardyń ómirsheńdigin baǵalaýǵa múmkindik beredi», - dedi Bolat Tilepov.

Budan buryn habarlanǵandaı, búgin Májiliste qaralǵan zań jobasynda azamattyq qyzmetke ornalasý kezinde eriktilerge artyqshylyqtar berýdi eskeretin normalar qamtylǵan.