Ózdiginen júretin 12 jolaýshyǵa arnalǵan elektrobýs jasaldy (VIDEO)

ASTANA. QazAqparat - AQSh astanasy Vashıngtonda taıaý arada shaǵyn qoǵamdyq kólik paıda bolady. IBM kompanııasy Local Motors-pen birlese otyryp pılotsyz Olli elektrobýsyn jasap shyqty. Avtobýsty IBM Watson sýperkompıýteri basqarady, al ony 3D-prınterde bólshekterin basyp shyǵara otyryp qurastyrmaq.

Bir avtobýsty basyp shyǵarýǵa 10 saǵat kerek, dep jazady Engadget. Ony qurastyrý kezinde 30 sensormen jabdyqtaıdy, onyń ishinde radar, lıdar men kameralar bolady. Kóliktiń barlyq aqparaty biryńǵaı sýperkompıýter ortalyǵyna kelip túsedi.

Shaǵyn avtobýsty aıaldamada kútýge bolady, nemese arnaıy uıaly qosymshasy arqyly shaqyrtý múmkindigi qarastyrylǵan. Kóliktiń jolaqysy qolma-qol aqshamen talap etilmeıdi, tek dittegen jerge jetkennen keıin esep-shottan alynady.

Avtobýsty synaý aldymen Vashıngtonda birneshe aı ishinde júrgiziledi. Keıinirek Olli Maıamı men Las-Vegas kóshelerine qatynaıdy.