Ózdigimen qozǵala almaıtyn múgedek adamdar vaktsınany qalaı alady
ALMATY. QazAqparat - «Respýblıkalyq elektrondyq densaýlyq saqtaý ortalyǵy» ShJQ RMK Almaty qalalyq fılıalynyń dırektory Gúlnar Ysqaqova onlaın brıfıng barysynda múgedektigi bar adamdar koronavırýsqa qarsy vaktsınany qalaı saldyratynyn túsindirdi, dep habarlaıdy QazAqparat tilshisi.
Onyń aıtýynsha, egde jastaǵy adamdar men múgedektigi bar jandarǵa vaktsına salý úshin medıtsına qyzmetkerleri úılerine barmaıdy.
«Vaktsınany úıge baryp salmaımyz. Óıtkeni vaktsınany muzdatylǵan kúıinde saqtaý úshin belgili bir rejım kerek. Qaladaǵy qoǵamdyq oryndarda uıymdastyrylǵan ekpe salý oryndary arnaıy tońazytqyshpen qamtylǵan, vaktsına sonda saqtalady. Eger júre almaıtyn adamdar vaktsına alǵysy kelse, emhanaǵa habarlasa alady. Mundaı kezde medıtsına qyzmetkerleri ekpe alýshyny emhanaǵa aparyp, sol jerde jaǵdaıyn tekserip, vaktsına salǵan soń úıine qaıta aparyp tastaıdy», - deıdi ol.
Sonymen qatar, ol qaladaǵy ekpe salý oryndarynyń jumys ýaqyty adam kezegi kóbeıse, uzartylatynyn aıtty.
«Qaladaǵy emhanalar tańǵy 8.00-den keshki saǵat 20.00-ge deıin jumys istep keldi. Sondyqtan ekpe salý kezinde de osy jumys ýaqytyn saqtaımyz. Eger adamdar legi kóp bolsa, emhana jumys ýaqytyn sozýǵa májbúr bolady, ıaǵnı sońǵy kelýshige deıin. Degenmen túngi saǵat 24:00 kezinde adamdar ekpe saldyrýǵa keledi dep oılamaımyn», - deıdi Gúlnar Ysqaqova.
