«Ózderin salystyra beredi»: Sarapshy zýmerlerdi kúızeliske túsiretin basty sebepti atady
ASTANA. KAZINFORM — Qazirgi jastar burynǵy býyn kórgen materıaldyq qıyndyqtardy bastan ótkermese de, olardyń ózine tán psıhologııalyq máseleleri bar. Otbasy psıhologi Erjan Myrzabaev BIZDIÑ ORTA podkastynda zýmerlerdiń nege mazasyzdyqqa beıim bolyp bara jatqanyn túsindirdi.
Mamannyń aıtýynsha, ár býynnyń óz qıyndyǵy bolady. Sondyqtan qazirgi jastardyń ómirin burynǵy urpaqpen salystyrý durys emes.
— 1980–1990 jyldary adamdardy kóbine jumys, aqsha jáne turmys máselesi alańdatty. Al qazirgi jastarǵa psıhologııalyq qysym kóbirek áser etedi. Olar ózin únemi basqalarmen salystyryp júredi, — dedi psıholog.
Onyń sózinshe, buǵan áleýmettik jeliniń yqpaly da aıtarlyqtaı áser etip otyr.
— Qazirgi jastar kún saıyn áleýmettik jeliden bireýdiń jetistigin, tabysyn, ádemi ómirin kóredi. Sonyń saldarynan «Ol jetistikke jetti, men nege jete almadym?», «Men bir nárseden qalyp qoıyp jatqan joqpyn ba?» degen oı mazalaıdy. Mundaı salystyrý adamnyń ishki mazasyzdyǵyn kúsheıtedi, — deıdi maman.
Psıholog burynǵy býyn men qazirgi jastardyń ómir súrý daǵdysy múlde bólek ekenin aıtady.
— Buryn mektepten ne jumystan shyqqan soń adam tynyǵyp, óz ýaqytymen ómir súretin. Al qazir jastar táýlik boıy aqparattyń ishinde júredi. Telefon, áleýmettik jeli jáne túrli chattar adamnyń mıyn únemi sharshatyp otyrady, — dedi Erjan Myrzabaev.
Sarapshynyń pikirinshe, urpaqtar arasyndaǵy túsinispeýshilik te osy aıyrmashylyqtan týyndaıdy.
— Úlken býyn keıde «Іsher asyń, kıer kıimiń bar, saǵan taǵy ne jetpeıdi?» dep oılaıdy. Sebebi olar materıaldyq qıyndyqtardy bastan ótkerdi. Al qazirgi jastar kóbine mazasyzdyqpen, jalǵyzdyqpen jáne psıhologııalyq qysymmen betpe-bet keledi. Alaıda úlken býyn muny árdaıym túsine bermeıdi, — dep túıindedi psıholog.
https://kaz.inform.kz/news/zumerler-zhumistan-tek-aksha-emes-magina-zdeyd-psiholog-edd67440 Aıta keteıik, buǵan deıin psıholog zýmerlerdiń jumystan tek tabys emes, maǵyna izdeıtinin aıtqan edi.
