Ózderine para bergeni týraly habarlaıtyn laýazymdy tulǵalardyń sany artýda - Qarjy polıtsııasy
ASTANA. 10 qazan. QazAqparat - Ózderine para bergeni týraly habarlaıtyn laýazymdy tulǵalardyń sany ósip keledi.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasynyń) resmı ókili Murat Jumanbaı málim etti.
«Qarjy polıtsııasyna ózderine para bergeni týraly habarlaıtyn laýazymdy tulǵalardyń sany artýda. Qarjy polıtsııasy bul aryzdar boıynsha para berýshilerdi jaýapqa tartýǵa qajetti sharalardy qabyldaýda», - dedi ol.
Resmı ókildiń aıtýynsha, Atyraý oblysynda qalalyq turǵyn úı komıssııasynyń ınspektory Baıqutov jáne merdiger kásiporyndardyń dırektorlary Haırýllın, Sárseshov, Muratbaev, Epıtashvılıden turatyn para berýshilerdiń toby qamaýda alyndy. Olar 2011-2012 jyldar aralyǵynda turǵyn úı-kommýnaldyq sharýashylyqty jańǵyrtýǵa bólingen bıýdjet qarajatynyń maqsatsyz jumsalý faktileri boıynsha oń sheshim shyǵarý úshin Atyraý qalasy prokýrorynyń kómekshisine 2 mln. teńge para berdi dep aıyptalýda. Atyraý oblystyq prokýratýrasy atalǵan qylmystyq isti tergeýdi aıaqtady.
«CGC Overseas Construction CO LTD» kásipory fılıalynyń dırektory QHR azamaty Peng Aimin Energetıkalyq qadaǵalaý jáne baqylaý komıtetiniń Qaraǵandy oblystyq aýmaqtyq departamenti basshysyna deldal arqyly 4 myń AQSh dollary kóleminde para bergeni áshkerelenip, oǵan 2 500 AEK mólsherinde aıyppul tóleý jazasy kesildi. Ol parany kásiporyn qyzmetin tekserý kezinde anyqtalǵan buzýshylyqtardy jasyrý úshin bergen. Paradan bas tartqan jáne ol týraly habarlaǵan laýazymdy tulǵa qarjy polıtsııasy tarapynan syıaqyǵa ıe boldy», - dedi M.Jumanbaı.
