Ózderin prokýratýra qyzmetkeri retinde tanystyryp, aqsha bopsalaǵandarǵa qatysty qylmystyq is qozǵaldy

ASTANA. QazAqparat - Astana qalasynyń quqyq qorǵaý organdary belgisiz bireýlerdiń mektepke deıingi mekemelerdiń jetekshilerine telefon shalyp, ózderin prokýratýra organdarynyń qyzmetkeri retinde tanystyryp, aqsha bopsalaý faktilerin anyqtady, dep habarlaıdy QR Bas prokýratýrasynyń baspasóz qyzmetinen.

«Elordalyq balabaqshalardyń biriniń jetekshisine telefon soqqan adam ózin Bas prokýratýranyń qyzmetkeri retinde tanystyryp, oǵan qatysty prokýrorlyq tekseris júrgizilip jatqanyn jáne tekseristiń oń nátıjesi bolýy úshin 100 myń teńge tóleý qajettigin habarlaǵan», - dep jazylǵan habarlamada.

Budan bólek oqıǵa boıynsha da ózin Bas prokýratýranyń qyzmetkerimin dep tanystyrǵan beıtanys bireý Astana qalasynyń Bilim basqarmasy balalar baqshalarynda tekseris júrgizýdi josparlap otyrǵandyǵyn habarlap, eger belgili bir syıaqy tólengen jaǵdaıda mekemeni tekseriletinder tiziminen aldyryp tastaý máselesin sheshýge bolatyndyǵy týraly usynys jasaǵan.

Qazirgi ýaqytta alaıaqtyq oqıǵalarynyń barlyq faktilerine qatysty qylmystyq is qozǵalyp, tekseris júrgizilýde.

Osy oraıda Bas prokýratýra azamattarǵa erekshe saqtyq tanytýdy jáne alaıaqtardyń qurǵan qaqpanyna túsip qalmaýdy eskertedi. Eger dál osyǵan uqsas qońyraýlar shalynyp jatqan jaǵdaıda Bas prokýratýranyń 71-26-20 senim telefonyna dereý habarlasý kerek.