«Ózbekten ozýdyń joly bar ma?» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, Astanada Qazaqstan Respýblıkasy Aýǵan soǵysy ardagerleri uıymdarynyń birinshi quryltaı sezi ótti. Oǵan Parlament depýtattary men oblystyq aýǵan soǵysy ardagerleri uıymdarynyń ókilderi qatysty.Sezde úsh másele qaraldy. Birinshisi - Qazaqstan Respýblıkasy Ardagerleri uıymdarynyń úılestirý keńesin qurý, ekinshisi - sol keńestiń tóraǵasyn saılap, onyń erejesi men qurylymyn bekitý úshin jumys tobyn qurý jáne úshinshi másele - aýǵan soǵysy ardagerleriniń problemalaryn talqylaý. «Qazaqstan Qarýly Kúshteriniń ardagerleri» respýblıkalyq qoǵamdyq birlestigi tóraǵasynyń orynbasary, general-maıor Murat Naǵymanovtyń aıtýynsha, Ardagerler uıymdarynyń úılestirý keńesin qurý memleket pen qoǵam aldynda turǵan ózekti máselelerdi birigip sheshýge, talqylaýǵa, óskeleń urpaqqa patrıottyq tárbıe berýge arnalǵanyn, bul keńes aldaǵy kezde soǵys ardagerleri men olardyń týǵan-týystaryna qolushyn berip, olardyń problemalarymen aınalysatynyn aıtty. Jıynda kóterilgen osy jáne ózge de máseleler jóninde «Egemen Qazaqstan» basylymynyń búgingi sanyndaǵy «Úılestirý keńesi quryldy» atty maqaladan oqyńyz.
Memleket basshysy qańtar aıynyń sońyna qaraı ótken Úkimettiń keńeıtilgen májilisinde tutynýshylardyń quqyǵyn qorǵaý máselesin basa aıtqany belgili. Soǵan oraı jaqynda bolǵan Úkimet otyrysynda Básekelestikti qorǵaý agenttiginiń tóraǵasy Ǵ.Ábdirahymov tutynýshylardyń quqyǵyn qorǵaý salasyndaǵy memlekettik saıasatty iske asyrý jaıyn qozǵap, qazir jurt arasynda biraz daý týdyryp júrgen bahıla týraly da qadap aıtqan edi.Agenttik tóraǵasynyń aıtýynsha, ár naýqastyń qaltasynan 20-50 teńgeden jınap alý, bul zańda kórsetilmegen. Sondyqtan da bahılany qaı jerde kııý-kımeý kerektigin anyqtap, tipti tegin alatyndaı jaǵdaı jasaý qajettigin de alǵa tartty. Shynynda, osy bahılanyń ıesi de, baǵasyn belgileıtin de kásipkerler kórinedi. Tazalyqty alǵa tartýǵa bolar, tipti aqshasy barlar úshin 20-50 teńge túkke turmaıtyndaı da kóriner. «Al zeınetaqysyn talǵajaý etip júrgen qaltyldaǵan qarttardy, aılyǵy shaılyǵyna jetpeı dirdektep júrgen tabysy az otbasylardy qaıda qoıamyz? Qalaı desek te, qansha jerden bar júkti naryqqa artsaq ta, tutynýshylardyń quqyǵy degen máseleni esten shyǵarmaǵanymyz jón. Qazir bahıla týraly áńgime qaýlap barady. Bizdiń aıtpaǵymyz, bahıla - tazalyq úshin be, álde tabys kózi me? Bul másele «Egemen Qazaqstan» basylymynyń búgingi sanynda «Bahıla tazalyq úshin be ... álde?» taqyryppen jaryq kórdi.
***
Ońtústik Qazaqstan oblysynda kún birden jylyp ketti. Bıylǵy qystyń qarly bolǵany belgili. Arys qalasyna qarasty Montaıtas eldi mekeninen ótetin kanal erigen qardyń jáne jaýǵan jańbyrdyń sýyna toldy. Ol arnasynan asyp, topansý birqatar turǵyn úılerdi basyp qaldy. Muny Arys qalasy ákiminiń orynbasary, aýdandyq tótenshe jaǵdaılar komıssııasynyń tóraǵasy B. Dildábekov pen Arys aýdandyq tótenshe jaǵdaılar bóliminiń qyzmetkerleri rastady.
Montaıtas eldi mekeninde barlyǵy 614 úı bar. Aýylda 4088 adam turady. "19 úıdiń qora-qopsysy men aýlasyn sý alyp ketti. Qaýipti aımaqtan 300-ge jýyq adam kóshirildi. Adam shyǵyny joq, - dedi bizge aýdan ákiminiń orynbasary»,-dep jazady búgingi sanynda «Aıqyn» basylymy. Elimizdiń ońtústik óńirinde oryn alǵan tótenshe jaǵdaıdyń saldary jóninde «Montaıtasty topan sý aldy» atty maqaladan oqyńyzdar.
Sondaı-aq osy basylymnyń habarlaýynsha, taıaýda «ala taqııaly aǵaıyndar» ózderiniń qatary endigi 30 mıllıonǵa jetip qalǵandyǵyn qýana jarııalady. Ózbekstan Memstatkomy 2012 jyldyń 1 qańtaryndaǵy jaǵdaı boıynsha el halqynyń sany 29 mıllıon 559 myń adamdy quraǵandyǵyn habarlady. Al Qazaq eline bolsa, 17 mıllıondyq mejeniń ózi, talaı jyldan beri, saǵymdaı buldyrap, jetkizbeı keledi. Qazaqstannyń Statagenttigi ótken aptada, 2012 jyldyń 1 qańtarynda el halqynyń sany 16 mıllıon 675 myń adamdy quraǵandyǵyn málim etti. Qazaqstandyqtar qatary 2011 jyldyń basynan beri 233 myń adamǵa nemese nebary 1,4%-ǵa artqan. Qazaqtyń basy nege kóp óspeı otyrǵandyǵyn jáne basqa da túıtkilderdi bilý úshin qalaýlylar Densaýlyq saqtaý mınıstri S.Qaıyrbekovany Parlamentke shaqyrdy.Mınıstrdiń halyq qalaýlylarynyń aldynda osy máselege qatysty nendeı jaýap aıtqanyn «Aıqyn» basylymynyń búgingi sanyndaǵy «Ózbekten ozýdyń joly bar ma?» atty maqalasynan bilesizder.
***
«Kazahstanskaıa pravda» basylymy búgingi sanynda «Effektıvnost nadzora rastet» atty maqala shyǵardy. Basylymnyń habarlaýynsha, Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıteti departamentteriniń ókilderi 2011 jyly tehnıkalyq retteý salasy boıynsha 5 myń 114 tekserý júrgizgen. Olardyń 3 myń 137-i boıynsha túrli zańbuzýshylyqtar anyqtaldy. 2010 jyly 5 myń 900 tekserý jasalyp, 3 myń 76 kemshilik anyqtalǵan. Sondaı-aq ótken jyly 3 myń 125 jaǵdaı boıynsha 112 mıllıon teńgege aıyppul salynǵan.
