Ózbekstannyń jańa prezıdenti qaı elge birinshi sapar jasaıdy
ASTANA. QazAqparat - Erteń, jeltoqsannyń 24-i kúni Qyrǵystannyń prezıdenti Almazbek Atambaev Ózbekstanǵa jumys saparymen barmaqshy. Samarqandta ol ózbek eliniń jańa basshysymen kezdespek. Shavkat Mırzıeev bolsa, alǵashqy saparyn Qazaqstan nemese Tájikstan respýblıkasyna jasaıdy degen aqparat bar, dep habarlaıdy QazAqparat Ózbekstannyń «Ferǵana» agenttigine silteme jasap.
Agenttiktiń málimetine sáıkes, Qyrǵystan prezıdentiniń ózbek jerine jasaǵan sońǵy sapary 2008 jyly bolǵan.
«Osy jolǵy sapar eki el arasyndaǵy aımaqtyq baılanystaryn jaqsartady degen boljam bar. Islam Kárimovtyń tusynda ol baılanystar «qyrǵıqabaq soǵysqa» ulasyp ketýdiń sál-aq aldynda qalǵan. Sondaı-aq osy kezdesý Ózbekstannyń jańa prezıdenti úshin alǵashqy resmı shara bolmaq», - delingen resmı habarlamada.
Sapar barysynda A.Atambaev ózbek basshysymen jeke jáne keńeıtilgen quramda kezdesip, eldiń burynǵy prezıdenti Islam Kárimovtiń qabirine baryp qaıtpaq.
Al Ózbekstannyń jańadan saılanǵan prezıdenti Shavkat Mırzıeev óziniń alǵashqy saparyn Qazaqstanǵa nemese Tájikstanǵa jasaıdy, al kelesi jyldyń alǵashqy toqsanynda Máskeýge saparlaıdy degen málimet bar.
