Ózbekstannyń TJM turǵyndarǵa aıazǵa baılanysty Qazaqstanǵa saparlamaýǵa keńes berdi
ASTANA. QazAqparat - Ózbekstan Respýblıkasy TJM daǵdarysty jaǵdaıdy basqarý ortalyǵy turǵyndarǵa aýa raıynyń buzylýyna baılanysty Qazaqstanǵa ýaqytsha saparlamaýǵa keńes berdi. Bul týraly «QazAqparat» HAA Ózbekstan Respýblıkasy TJM saıtyna silteme jasap habarlaıdy.
«Qazaqstanda qatty aıazdy kúnder kútiledi. Osyǵan baılanysty Ózbekstan azamattarynan Qazaqstannyń soltústik, shyǵys jáne ortalyq bóligine jolaýshylar avtobýsymen jáne jeke kóliktermen saparlaýdy ýaqytsha toqtata turýdy suraımyz», - delingen Ózbekstan TJM taratqan habarlamada.
Qazgıdromet taratqan málimetterge qaraǵanda, 22 qańtardan bastap, ásirese 23-26 qańtar aralyǵynda aýa-raıy kúrt sýytyp, aýa temperatýrasy -35 - 40 gradýsqa deıin tómendeýi múmkin.
Eske salsaq, 22 qańtarda Aqtóbeniń Yrǵyz aýdanynda Ózbekstan azamattary mingen avtobýs isten shyqty. Olar Reseıdiń Ýfa qalasyna bara jatqan eken.
Sondaı-aq, 18 qańtar kúni tańerteń Samara-Shymkent tasjolynda jol apaty bolyp, jolaýshylarǵa toly avtobýs janyp ketti. Órt kezinde 52 adam qaza bolyp, 5 adamdy kúıik shaldy. Qazir kúıik shalyp, gazǵa ýlanǵandar Aqtóbe oblystyq jedel járdem aýrýhanasynda em qabyldap jatyr. Olardyń úsheýi Qazaqstan, ekeýi Ózbekstan azamaty.
