Ózbekstannyń Syrtqy ister mınıstrligi el aýmaǵyna bosqyndardy ótkizý týraly aqparattyq habarlama jasady

QazAqparat budan buryn habarlaǵandaı, maýsymnyń 14-i kúni bosqyndardyń ótkizilýi shektetilgen bolatyn. Ótkizý qosyndary arqyly negizinen jaraqat alǵandar, aýrýlar men balalar ótkiziletin.

ÓR syrtqy saıasat vedomstvosynyń aqparattyq habaramasynda aǵymdaǵy jylǵy maýsymnyń 14-inde birqatar aqparattyq agenttikterdiń Ózbekstan Qyrǵyzstanmen aradaǵyshekarasyn jaýyp, Qyrǵyzstan Respýblıkasyndaǵy ózbek ultynyń azamattaryn el aýmaǵyna ótkizýdi totqtatty degen aqparat taratqandyǵy atalyp ótilgen.

Maýsymnyń 15-inde túske qaraı Ózbekstan 100 myńǵa tarta adamdy qabyldap, olarǵa jatyn oryn, azyq-túlik berip, medıtsınalyq kómek kórsetken. Adamdardyń legi tolastar emes, jaǵdaı baqylaýǵa alyndy degen derekke qaramastan, Qyrǵyzstannyń ońtústigindegi jaǵdaı turaqtalǵan joq. Tek ózge ulttyń adamy bolǵandyqtan ǵana adamdar ólip jatyr.

«Taratylǵan jalǵan aqparat bireý úshin tıimdi bolyp otyrǵandyǵy anyq. Bireýler Ózbekstanǵa kóleńke túsirip, osy ýaqytqa deıin qaıǵyǵa dýshar bolǵan kórshiles eldiń azamattaryn qutqarý úshin jasaǵan is-áreketin joqqa shyǵarǵysy keledi», dep atalyp ótilgen aqparattyq habarlamada.

«Bul jerde búgingi tańda Qyrǵyzstanǵa kelgen gýmanıtarlyq kómek eldiń ońtústigine jetpeı, Bishkekte qalyp qoıatyndyǵy eskeriledi. Sonymen qatar, ol kómek tek laýazymdy ult azamattarynyń arasyna ǵana taratylady. Al shynymen kómekke zárý ózbek ultynyń azamattary kelip jatqan gýmanıtarlyq kómekten qaǵylyp otyr», - delingen ÓR SІM habarlamasynda.

Qazirgi tańda ózbek bıligi Ózbekstan memleketine shekaralas elden kelip jatqan adamdardy ornalastyrý boıynsha qıyndyqtarǵa tap bolyp otyr. Bosqyndardy ornalastyrý úshin jyldyń osy kezeńinde bos turǵan mektep, lıtseıler, jazǵy balalar lagerin qosa alǵanda demalys oryndary paıdalanylyp otyr.

Qyrǵyzstannan qashqan ózbek ulty azamattaryn qabyldaǵan jáne qabyldap otyrǵan Ózbekstandaǵy negizgi jerler - Jalalqudyq, Marhamat jáne Ándijan oblysyndaǵy Hodjıabad aýdandary bolyp qalýda.

QR Prezıdenti Nursultan Nazarbaev maýsymnyń 15-inde jasaǵan málimdemesinde Qyrǵyzstanǵa gýmanıtarlyq kómek berý týraly bastama kóterip, sondaı-aq júktiń jiberilgen meken-jaıyna jetýin qadaǵalaý týraly aıtty.