Ózbekstannyń Samarqan qalasynda týrıstik ortalyq qurylýda

TAShKENT. QazAqparat – Búgin Ózbekstan Respýblıkasy prezıdentiniń baspasóz hatshysy Sherzod Asadov Samarqan qalyn mıllıon turǵyny bar qalaǵa aınaldyrý boıynsha ótkizilip jatqan jumystar týraly aıtty, dep habarlaıdy QazAqparat tilshisi.

Prezıdenttiń resmı ókili Shavkat Mırzıeevtiń Samarqan oblysyna jasaǵan jumys saparynyń qorytyndylary týraly aıtyp berdi.

«Beısenbi kúni Ózbekstannyń memleket basshysy Samarqan oblysyna bardy. Biz onda ótkizilip jatqan kólemdi jumystyń kýágerleri boldyq.

Mysaly, Samarqan aýdanynda bizdiń tarıhymyz jáne mádenıetimizdiń aınasyna, «Jańa Ózbekstan» ıdeıasynyń beınesine aınalatyn týrıstik ortalyq qurylyp jatyr. Ortalyq halyqaralyq kongres-holl, «Máńgilik qala» kerýen saraıy, 8 tórt jáne besjuldyzdy qonaqúı, tematıkalyq saıabaqtar, demalys jáne oıyn-saýyq aımaqtary, qolóner ortalyǵy jáne jasandy kólderden turady», - dedi Sh.Asadov.

Spıker sondaı-aq bolashaqta qalada halyqaralyq áýejaı salynatynyn, onda quny 40 mıllıon dollar kargo-ortalyq bolatynyn jáne jańa aýdandarda turǵyn úıler boı kóteretinin atap ótti.

Onyń aıtýynsha, 2021-2022 jyldary Samarqan oblysynda jalpy quny 30,4 trıllıon somǵa 1279 ınvestıtsııalyq jobany iske asyrý belgilengen. 1,8 mıllıard dollarǵa tikeleı sheteldik ınvestıtsııalar ıgerilip, 26 myń turaqty jumys ornyn qurý josparlanyp otyr.

Eske salsaq, Ózbekstanda Týrızm jáne sport mınıstrligi qurylǵany týraly habarlaǵan bolatynbyz.