Ózbekstannyń OSK TMD elderi saılaý komıtetteri basshylarynyń konsýltatıvtik keńesin qurýdy usyndy
TAShKENT. QazAqparat – Ózbekstannyń OSK TMD-ǵa múshe memleketterdiń saılaý organdary basshylarynyń konsýltatıvtik keńesin qurý týraly bastama kóterdi.
Atalǵan bastamany Sankt-Peterbýrgte Ózbekstan OSK basshysy Zaınıddın Nızamhodjaev TMD-nyń Atqarýshy komıteti tóraǵasynyń birinshi orynbasary – Atqarýshy hatshysy Vıktor Gýmınskıımen kezdesý barysynda talqylady, dep habarlaıdy QazAqparat menshikti tilshisi Ózbekstan Respýblıkasy Saılaý komıtetiniń baspasóz qyzmetine silteme jasap.
«Bul Keńes azamattardyń saılaý quqyqtary men bostandyqtaryn qamtamasyz etý, Dostastyq memleketterinde halyqaralyq standarttarǵa negizdelgen saılaý men referendýmdar ótkizý úshin quqyqtyq jaǵdaılar jasaý maqsatynda TMD-ǵa múshe memleketterdiń saılaý organdary arasyndaǵy yntymaqtastyqqa yqpal etetin bolady», - dep atap ótti Z.Nızamhodjaev.
Óz kezeginde V.Gýmınskıı TMD-nyń Atqarýshy komıteti Ózbekstannyń OSK kótergen bastamany qoldaıtynyn aıtty.
«Ózbekstan Respýblıkasy ázirlegen Konsýltatıvtik keńes týraly erejeniń jobasy TMD-ǵa múshe memleketterdiń qaraýyna jiberildi, joǵaryda atalǵan erejeler jobasyn pysyqtaý jáne kelisý úshin saraptamalyq toptyń otyrysyn 2021 jyldyń 30 maýsymynda beınekonferentsııa arqyly ótkizý josparlanyp otyr»,- dep málimdedi V.Gýmınskıı.
