Ózbekstannyń Ortalyq saılaý komıssııasy parlamenttik saılaýdyń aldyn-ala qorytyndysyn jarııalady
TAShKENT. Jeltoqsannyń 29-y. QazAqparat /Qurmat Samarhan/ - Saılaýdyń aldyn-ala qorytyndylary boıynsha Ózbekstanda Olıı Majlıstiń 94 depýtaty saılandy.
Bul týraly dúısenbi kúni baspasóz máslıhatynda Ózbekstannyń Ortalyq saılaý komıssııasynyń tóraǵasy Myrza-Ulyqbek Ábdisalomov málim etti.
Komıssııa basshysynyń aıtýynsha, saıası partııalardyń atynan depýtattyqqa túsken kandıdattardyń arasynda birinshi kezeńde 94 depýtat saılanyp otyr, ıaǵnı, tómengi palataǵa saılaý boıynsha 135 okrýgtiń 94-inen depýtattar saılandy. «Bul parlament tómengi palatasyndaǵy jalpy depýtattar sanynyń 69,7 paıyzyn quraıdy», - dep túsirdirdi ol.
M.Ábdisalomovtyń aıtýynsha, zańnamaǵa sáıkes, saılaýdyń qorytyndylaryn anyqtaý kezinde, saılaýshylardyń 50 paıyzdan astamynyń daýysyn alǵan depýtattar saılanǵan bolyp esepteledi. «Depýtattyqqa usynylǵan kandıdattarynyń birde-biri jetkilikti daýys ala almaǵandyqtan, 40 okrýg boıynsha Zań shyǵarý palatasyna depýtattar saılanǵan joq», dep atap kórsetti Ózbekstannyń Ortalyq saılaý komıssııasynyń tóraǵasy.
«Ózbekstan Respýblıkasy Olıı Majlısine saılaý týraly» Zańnyń 45-shi babyna sáıkes, eger okrýg boıynsha depýtattyqqa eki kandıdattan artyq adam tússe jáne olardyń birde-bireýi saılanbasa, okrýgtik saılaý komıssııasy okrýgte kóbirek daýys alǵan eki kandıdat boıynsha qaıta daýys berý ótkizý týraly sheshim qabyldaıdy. Qaıta daýys berý kezinde ekinshi kandıdattan kóbirek daýys alǵan kandıdat saılanǵan bolyp sanalady.
Ulttyq saılaý zańnamasyna sáıkes, saılaý qorytyndysy týraly habarlama men saılanǵan depýtattardyń tizimin Ortalyq saılaý komıssııasy saılaýdan keıin 10 kúnnen keshiktirmeı, ıaǵnı 2010 jyly qańtardyń 6-syna deıin baspasóz betinde jarııalaıtyn bolady, - dep habarlady komıssııa tóraǵasy.
