Ózbekstannyń ońtústiginde eki adam selge aǵyp ketti
TAShKENT. QazAqparat – 10 mamyrda Ózbekstannyń ońtústiginde nóser jaýynnyń arty selge ulasyp, eki adamdy aǵyzyp ketti, dep habarlaıdy QazAqparat Ózbekstan Tótenshe jaǵdaılar mınıstrliginiń Telegram-kanalyna silteme jasap.
Vedomstvonyń málimetinshe, 10 mamyr kúni saǵat 16:00 shamasynda Surhandarııa oblysynyń Saryasy aýdanynda nóser jaýyn saldarynan úsh adamdy sel shaıyp áketken. Olardyń biri baqtashy bolsa, taǵy ekeýi Nexia kóliginde otyrǵan.
Baqtashy joıqyn selden qutylyp úlgergen, al kóliktegi adamdardyń taǵdyry belgisiz. Qazir eldiń Tótenshe jaǵdaılar mınıstrliginiń qyzmetkerleri, jergilikti turǵyndar men basqa da tıisti bólimsheler qutqarý jáne izdestirý jumystaryn júrgizýde.
Buǵan deıin habarlanǵandaı, sáýir aıynda jaýǵan nóser jańbyrdan Ózbekstanda sońǵy 80 jyldaǵy eń iri sý tasqyny men sel boldy. Ózgıdromettiń sońǵy málimetinshe, 9-13 mamyrda Ózbekstannyń taýly aımaqtarynda jańbyr jaýady, soǵan baılanysty sel men sý tasqyny qaýpi kúsheıetini kútilýde.
