Ózbekstannyń Innovatsııalar mınıstrligi: koronavırýsqa qarsy qytaı-ózbek vaktsınasynyń tıimdiligi - 97%

TAShKENT. QazAqparat – Qytaı jáne ózbek elderiniń koronavırýsqa qarsy shyǵarǵan ZF-UZ-VAC 2001 vaktsınasynyń tıimdiligi 97 paıyzdy qurap otyr, al preparattyń qaýipsizdigi – 99 paıyz. Bul týraly Ózbekstan Olıı Májilisine vaktsınanyń klınıkalyq synaǵynyń nátıjesin usyný barysynda Ózbekstannyń Innovatsııalyq damý mınıstrligi málim etti, dep habarlaıdy QazAqparat.

Ózbekstannyń Innovatsııalyq damý mınıstriniń birinshi orynbasary Shahlo Týrdıkýlov «Ózbekstan 24» telearnasyna bergen túsiniktemesinde qytaı-ózbek vaktsınasynyń tıimdiligi men qaýipsizdiginińǵ ǵylymı jáne praktıkalyq dálelderi el parlamentine usynylǵanyn aıtty.

«Biz qytaılyq áriptesterimizben birge álemde koronavırýsqa qarsy eń tıimdi ári qaýipsiz vaktsınalardyń birin shyǵardyq, ol ZF-UZ-VAC 2001 brendtik ataýyna ıe. Bul – otandyq ǵylym salasynyń úlken jetistigi elimizdi jeke vaktsınany shyǵarýshy elder qataryna kirgizdi. Bul vaktsına óte kúrdeli klınıkalyq zertteýlerden ótti. Barlyq jumystar óte qatań standarttar boıynsha, halyqaralyq talaptarǵa sáıkes júrgizildi. Qazirgi kezde vaktsına DDSU qaıta tirkeý kezeńinen ótip jatyr», - dep baıandady spıker.

Bul rette atalǵan vaktsınanyń joǵary tıimdiligi men keri áseriniń bolmaýy atap ótiledi.

Eske sala ketsek, Ózbekstan Zhifei Loncom Biofharmaceutical kompanııasy jasap shyǵarǵan qytaılyq vaktsınanyń qosarlas avtory bolyp tanyldy. Nátıjesinde respýblıkanyń ishki naryǵynda ol ZF-UZ-VAS 2001 ataýyna ıe bolǵan.