Ózbekstannyń eki oblysyn sý basyp 4 adam kóz jumdy

TAShKENT. QazAqparat - Tolassyz jaýǵan jańbyr saldarynan Ózbekstannyń Samarqand jáne Jyzaq oblystarynyń kóp bóliginde sý tasqyny boldy. Bul týraly eldiń tótenshe jaǵdaılar mınıstrligine silteme jasap ÓzA agenttigi habarlaıdy.

Eldiń Tótenshe jaǵdaılar mınıstrliginiń málimetinshe, 19 sáýirde bastalǵan nóser jańbyrdan keıin 20 sáýirde Samarqand jáne Jyzaq oblystarynyń birqatar aýdandarynda sel men sý tasqyny baıqaldy.

Atap aıtqanda, sý tasqyny Jyzaq oblysynyń Bahmal, Forısh, Ǵallaaral jáne Sh.Rashıdov aýdandarynda baıqalǵan. Aldyn ala málimet boıynsha, Forısh aýdanyndaǵy sý tasqyny saldarynan 4 adam (1 er, 3 áıel) qaza tapqan.

Tolassyz jaýǵan jańbyr saldarynan Samarqand oblysynyń Ishtıhon, Býlýnǵyr jáne Úrgýt aýdandarynda sý tasqyny bolyp, M-39 halyqaralyq tas jolynyń bólikterin sý basqany aıtylady habarlamada.

Qazirgi ýaqytta qutqarýshylar tótenshe jaǵdaı saldaryn joıý sharalaryn qabyldaýda.