Ózbekstannyń bas prokýratýrasy Aýǵanstanda ushaqtyń qulaýyna qatysty málimdemesin qaıtaryp aldy

TAShKENT. QazAqparat – Ózbekstan Respýblıkasynyń Bas prokýratýrasy Ózbekstan aýmaǵynda qulaǵan Aýǵanstannyń Áskerı áýe kúshteri ushaǵynyń qulaý sebepteri týraly resmı habarlamasyn kenetten qaıtaryp aldy, dep habarlaıdy QazAqparattyń menshikti tilshisi.

«Bas prokýratýranyń vedomstvonyń Telegram-kanalyndaǵy burynǵy málimdemesi aıaǵyna deıin naqtylanbaǵan edi, ol jaýapty vedomstvolardyń tekserilgen derekterine negizdelmegen bolatyn», - delingen Ózbekstannyń Bas prokýratýrasynyń jańa málimdemesinde.

Sonymen qatar Bas prokýratýra jiberilgen qatelik úshin keshirim surady.

Eske sala keteıik, keshe Ózbekstannyń Bas prokýratýrasy Aýǵanstannyń Áskerı áýe kúshteri ushaǵynyń qulaý sebepteri týraly aıtqan bolatyn. Sonymen qatar Ózbekstan aýmaǵyna Aýǵanstan Islam Respýblıkasynyń 46 áskerı áýe kemesiniń májbúrli túrde qonǵany týraly habarlaǵan.

Mádıbek Jánibekov.