Ózbekstannyń bas konsýly Túrkistanǵa keldi
TÚRKІSTAN. QazAqparat - Búgin Túrkistan qalasynda Túrkistan oblysy ákiminiń orynbasary Meıirjan Myrzalıev pen Almatydaǵy Ózbekstan Respýblıkasynyń bas konsýly Abror Fathýllaevtyń kezdesýi ótti, dep habarlaıdy QazAqparat tilshisi.
Kelissózder barysynda taraptar halyqaralyq týrızmdi damytý máselelerin talqylady.
«Ózbekstandaǵy kelý týrızminiń damýyn jáne onyń Túrkistan oblysyna jaqyn ornalasqandyǵyn eskere otyryp, biz qalalarymyzdaǵy sheteldik týrısterdiń qyzyǵýshylyǵyn arttyratyn birlesken týrıstik paketterin qurýdy usynamyz», - dedi oblys ákiminiń orynbasary Meıirjan Myrzalıev.
Aıta keteıik, Ortalyq Azııadaǵy belsendi ózgerip otyrǵan ahýal aıasynda aımaqtaǵy kólik, logıstıka jáne qyzmet salasynda transshekaralyq yntymaqtastyqty damytý úshin qolaıly jaǵdaılar jasalýda. Bul úshin Azııa Damý bankiniń qoldaýymen Túrkistan oblysy ákimdigi «Soltústik - Ońtústik» halyqaralyq kólik dáliziniń strategııalyq bóligi bolyp tabylatyn «Túrkistan - Shymkent - Tashkent - Hýdjand» ekonomıkalyq dálizin qurýdyń bastamashysy boldy. Sonymen qatar, Batys Eýropa - Batys Qytaı halyqaralyq kólik dálizi boıyndaǵy aımaqtyń tıimdi ornalasýy Qytaı men Eýropanyń mıllıardtyq naryqtaryna kirý úshin keremet tranzıttik jáne logıstıkalyq múmkindikterin usynady.
Óz kezeginde Bas konsýl Abror Fathýllaev osy jobalardyń eki eldiń ekonomıkalary úshin mańyzdylyǵyn atap ótti. Sondaı-aq, Bas konsýl Túrkistan aımaǵynyń qazaqstandyq jáne ózbek kompanııalarynyń qatysýymen birlesken jobalardy damytý úshin úlken áleýetke ıe ekenin jetkizdi. Búgingi kúni Ózbekstannan Qazaqstanǵa negizinen kókónis, jemis-jıdek, keptirilgen jemister, tekstıl jáne avtokólikter sııaqty taýarlar jetkiziledi, al Qazaqstannan Ózbekstanǵa un, munaı ónimderi, metall ónimderi men tsement ımporttalady.
Kezdesýdiń qorytyndysy boıynsha taraptar yntymaqtastyqtyń qarqynyn arttyrýǵa jáne ózara tıimdi yntymaqtastyqty damytýǵa daıyn ekendigin bildirdi.
