Ózbekstannyń bas konsýly qaraǵandylyq dárigerlerge alǵys aıtty
QARAǴANDY. QazAqparat - Almatydaǵy Ózbekstan Respýblıkasynyń bas konsýly Abror Fathýllaev Prıozersk qalasy ortalyq aýrýhanasynyń jetekshisi men ujymyna alǵys bildirdi, dep habarlaıdy QazAqparat tilshisi Qaraǵandy oblystyq densaýlyq saqtaý basqarmasynyń baspasóz qyzmetine silteme jasap.
Dıplomatııalyq ókil Qazaqstan Respýblıkasynyń Densaýlyq saqtaý mınıstri Eljan Birtanovtyń atyna hat joldady.
«Qurmetti Eljan Amantaıuly,
Bıylǵy 13 shildede Jambyl oblysynyń Moıynqum aýdanynda bolǵan jol-kólik oqıǵasy saldarynan Ózbekstan Respýblıkasynyń bes azamaty: B. Gýlekeev, A. Joldasbaev, S. Saıtnazarov, H. Seıtmýratov jáne O. Naýbetov túrli deńgeıdegi jaraqattarmen Prıozersk qalasynyń qalalyq aýrýhanasyna jetkizildi. Ol jerde olarǵa joǵary bilikti mamandar jedel medıtsınalyq kómek kórsetti.
Aýrýhana dárigerleriniń joǵary biliktiliginiń arqasynda Ózbekstan eliniń azamattary der kezinde qajetti em alyp, eline oraldy.
Osy oqıǵaǵa baılanysty Bas konsýldyq «Prıozersk qalasynyń ortalyq aýrýhanasy» KMM barsha ujymyna, jáne aýrýhana dırektory N. Shaǵyrovqa, hırýrg M. Paızýllaevqa Ózbekstan Respýblıkasynyń azamattaryna ýaqtyly kórsetilgen medıtsınalyq kómek pen qamqorlyq úshin alǵys aıtady.
Qurmetpen, bas konsýl A. Fathýllaev».
Eske sala keteıik, 13 shildede Almaty – Ekaterınbýrg tas jolynyń 380-shi shaqyrymynda jol apaty bolǵan. Mıgratsııalyq zańnamany buzýshylardy eline qaıtarý kezinde SsanYong qyzmettik kóligi aýdarylyp, Moıynqum aýdanynyń polıtsııa bóliminiń eki qyzmetkeri men Ózbekstan Respýblıkasynyń bir azamaty qaza boldy.
