Ózbekstannyń altyn-valıýta qory ulǵaıdy
ASTANA. QazAqparat - Ózbekstannyń altyn-valıýta qory 2017 jyly 1,4 mıllıard dollarǵa artty, dep habarlaıdy «QazAqparat» HAA Ózbekstannyń Ortalyq bankine silteme jasap.
2017 jyldyń qorytyndylary boıynsha, taza altyn-valıýta qorynyń kólemi 26,6 mıllıard dollardy qurady.
Ortalyq bank tóraǵasynyń birinshi orynbasary Tımýr Ishmetovtiń aıtýynsha, oǵan ótken jylǵy kúzden beri 750 mıllıon dollar qosylǵan. 2017 jyldyń ekinshi jartysynda aqsha-nesıe saıasatyn ózgertken mańyzdy makroekonomıkalyq faktorlardyń biri valıýta saıasatynyń yryqtandyrylýy boldy.
Qoldanylǵan sharalar 2017 jyldyń alǵashqy jartysymen salystyrǵanda, qyrkúıek-jeltoqsan aılarynda bankterdiń sheteldik valıýta satý-satyp alý boıynsha júrgizgen ortasha aılyq operatsııalarynyń turaqty túrde artýyna jaǵdaı jasaǵan. Naqtyraq aıtqanda, zańdy tulǵalardyń sheteldik valıýtany satyp alý kórsetkishi 60%-ǵa, al satý kólemi tórt esege artqan.
Qyrkúıektegi devalvatsııadan keıin sheteldik valıýtany Ózbekstan ulttyq valıýtasyna aıyrbastaý baǵamy birshama turaqtandy: 1 AQSh dollarynyń ortasha baǵamy 8049-8138 sým tóńireginde saqtaldy.
