Ózbekstannyń 88 paıyz halqy prezıdenttik saılaýda tańdaý jasady
ASTANA. QazAqparat - Ózbekstan Ortalyq saılaý komıssııasynyń málimetinshe, daýys berýge qatysqandar elektorattyń 88 paıyzyn qurady, dep habarlaıdy QazAqparat.
Ózbekstanda el prezıdenti laýazymyna saılaý aıaqtaldy. Daýys berý jeksenbi, 4 jeltoqsan kúni saǵat 06.00-de bastalyp, 20.00-de aıaqtaldy. Tús aýa Ortalyq saılaý komıssııasy saılaýdy ótti dep tanydy, sebebi kelýshilerdiń sany qajetti 33 paıyzdan asyp jyǵyldy.
OSK-nyń málimetinshe, saılaýda 17 mln. 941 myń 955 adam daýys berdi, bul elektorattyń 87,83 paıyzy. Bul týraly 4 jeltoqsan kúni qorytyndy brıfıngte OSK tóraǵasy Mırza-Ýlýgbek Abdýsalomov aıtty.
Daýys berý el ishindegi - 9383 jáne shet elderdegi 44 saılaý ýchaskesinde ótti. OS K tóraǵasy daýys berýdiń nátıjesi boıynsha bolashaq prezıdent týraly aldyn ala málimetterdi atamaı, alǵashqy nátıjeler 5 jeltoqsan kúni tústen keıin aıtylatynyn jetkizdi.
Buǵan deıin habarlanǵandaı, saılaýǵa tórt úmitker qatysýda - prezıdent mindetin atqarýshy Shavkat Mırzıeev Ózbekstannyń lıberal-demokratııalyq partııasy atynan túsýde, Hatamjon Ketmonov Halyq -demokratııalyq partııasynan, Narıman Omarov sotsıal-demokrattardan jáne parlamenttiń tómengi palatasynyń vıtse-spıkeri Sarvar Otamýratov demokratııalyq partııadan saılaýǵa qatysýda.
