Ózbekstannyń 5 áýejaıyna Tax Free júıesi engizildi

TAShKENT. QazAqparat – Ózbekstannyń bes áýejaıynda Tax Free jumys isteı bastady. Onda sheteldik azamattar satyp alǵan taýar úshin QQS (qosylǵan qun salyǵy) somasyn qaıtara alady, dep habarlaıdy QazAqparat menshikti tilshisi.

Uzbekistan Airports baspasóz qyzmetiniń málimetinshe, 2 qańtarda Tashkent, Samarqand, Buhara, Ferǵana men Ýrgench áýejaılarynda Tax Free baǵanynyń resmı ashylýy ótti.
Tax Free júıesine sáıkes, sheteldik azamattar Ózbekstanda bólshek saýdamen aınalysatyn kásipkerlerden jeke taýar túrlerin satyp alǵanda ustalynatyn QQS somasy shetel azamattaryna qaıtaryp beriledi. Keshbek qoldanylatyn taýar tizimi Mınıstrler kabınetiniń 2022 jylǵy 8 qarashadaǵy qaýlysynda kórsetilgen. Olar kádesyılar, jańǵaq túrleri, jemis-jıdekter men keptirilshen jemister, teri men jún ónimderi, kilemder, tekstıl men basqa da zattar.
QQS qaıtarý úshin Soliq uıaly qosymshasyna tirkelip, satyp alǵan taýardyń chegin engizý qajet. Ushar aldynda jolaýshy áýejaıda reıske tirkeýden ótip, Tax Free baǵanyna barý qajet. Keıin taýar men otyrǵyzý talonyn kórsetedi. Tirkelgen taýardy qol júgimen alyp júrýge nemese tirkeý baǵanyna baryp, júkke ótkizý qajet.
Tax Free júıesine sáıkes keletin taýardyń jalpy somasy 1 mln sýmnan az bolmaýy tıis. Sondaı-aq taýar ashylmaǵan jáne qoldanylmaǵan bolýy shart. Salyq komıtetiniń qyzmetkerleri taýardy tekseoip, keshbek rásimdeıdi. Keshbek jolaýshynyń kartasyna rásimdelip, keıingi aıdyń 25-inen keıin tólenedi.