Ózbekstannyń 34 azamaty Aqtóbede qoqys polıgonynda zańsyz jumys istep júrgen

AQTÓBE. QazAqparat – Aqtóbelik polıtseıler qoqys polıgonyna zańsyz kirip, onda plastıkalyq bótelke jınap júrgen ózbekstandyq azamattardy ustady. Báriniń de qolynda tólqujaty bolmaı shyqty, dep habarlaıdy QazAqparat tilshisi.

Aqtóbede 22-25 mamyr aralyǵynda «Mıgrant» jedel-profılaktıkalyq is-sharasy ótkizilip jatyr.

Búgin qaladaǵy qoqys polıgonynda plastıkalyq qutylardy jınap, tapsyrýmen aınalysyp júrgen Ózbekstan Respýblıkasynyń 34 azamaty anyqtalyp, ustaldy.

Ol jerde er adamdarmen birge áıelder de bar.

«Jeke basyn anyqtaıtyn qujattary bolmady. Soǵan baılanysty bári Aqtóbe qalasy PB qabyldap-taratý ornyna jetkizildi. Qazirgi tańda atalǵan sheteldikterdiń jeke basyn anyqtaý jumysy júrgizilip jatyr. Keıin QR ÁQBtK-niń 517-babynyń talaptaryn buzǵandyǵy úshin ákimshilik jaýapqa tartý máselesi sheshiledi. Bári de eline qaıtarylady»,- dedi oblystyq PD baspasóz qyzmetiniń jetekshisi Erbolat Sarqulov.

Eske salsaq, buǵan deıin Aqtóbe oblysynda bopsalaýmen aınalysyp kelgen qylmystyq top ustalǵan edi.

Anyqtalǵandaı, olar kásipkerden qomaqty soma bopsalaǵan, sondaı-aq «Toıota Kamrı» avtokóligin óz attaryna aýdarýdy talap etken.

Ustalǵandardan patrondary bar 2 travmatıkalyq tapansha men pyshaq tárkilendi.

Atalǵan derek boıynsha QR Qylmystyq kodeksiniń 194-baby 3-bóligi («Bopsalaý») boıynsha sotqa deıingi tergeý júrip jatyr. Ustalǵandar qamaýǵa alyndy.