Ózbekstannyń syrtqy qaryzy 72 mlrd dollardan asty

TAShKENT. KAZINFORM – Bıyl birinshi toqsanda Ózbekstannyń syrtqy qaryzy 8 mlrd dollarǵa ósti, dep habarlaıdy Kazinform agenttiginiń menshikti tilshisi.

Ózbekstan Ortalyq bankiniń dereginshe, qańtar-shilde aılary aralyǵynda eldiń jıyntyq syrtqy qaryzy 72,2 mlrd dollarǵa jetti. Onyń ishinde 36,8 mlrd dollar memlekettiń syrtqy qaryzy bolsa, 35,4 mlrd dollar korporatıvtik bereshek sanalady.

Retteýshi organnyń esebinde baıandalǵandaı, birinshi toqsanda álemdik ekonomıkada kúrdeli ózgerister boldy. Osyǵan baılanysty jahandyq naryqta energııa resýrstarynyń baǵasy qymbattady. Bul úrdis Ózbekstannyń eksport áleýetiniń álsireýine jol bermedi.

Sáıkesinshe, eksport pen ımport arasyndaǵy teris saldo 20%-ǵa qysqaryp, 6,4 mlrd dollarǵa teńeldi. Sondaı-aq, birinshi jartyjyldyqta tikeleı sheteldik ınvestıtsııalar kólemi 42%-ǵa ósip, 1,6 mlrd dollarǵa jetti.

Eske salaıyq, bıyl qańtar-naýryz aılary aralyǵynda Ózbekstannyń jıyntyq syrtqy qaryzy 4,3 mlrd dollarǵa ulǵaıyp, 68 mlrd dollardan asqan edi.

Sonymen qatar, 2024 jyldyń qorytyndysy boıynsha Ózbekstannyń jalpy memlekettik syrtqy qaryzy 10,8 mlrd dollarǵa ósip, 64,1 mlrd dollarǵa teńelgen bolatyn.

Qosa ketsek, Ózbekstan bıligi ústimizdegi jyldyń sońyna deıin eldiń ishki jalpy ónim kólemin 130 mlrd dollarǵa jetkizýdi josparlap otyr.