Ózbekstannyń úsh ýnıversıteti álemdik reıtıngige endi

QS Sustainability Rankings – 2024 álemdegi úzdik ýnıversıtetter reıtıngine úsh ózbekstandyq joǵary oqý orny endi, dep habarlaıdy Kazinform agenttiginiń menshikti tilshisi.

Jalpy reıtıngige 95 eldiń 1 397 oqý orny kirgen. Onyń arasynda qorshaǵan ortany qorǵaý salasyndaǵy basqarý júıesin uıymdastyrý jáne ornyqty damý maqsattaryn oryndaýda joǵary nátıje kórsetken Ózbekstannyń úsh ýnıversıteti bar.

Atap aıtqanda, Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýty 701-orynǵa jaıǵasty.

I. Karımov atyndaǵy Tashkent memlekettik tehnıkalyq ýnıversıteti 1101-orynǵa turaqtasa, Mırzo Ulyqbek atyndaǵy Ózbekstan ulttyq ýnıversıteti 1201-orynda.

Reıtınginiń kóshin Toronto ýnıversıteti bastap tur. Ekinshi orynda — Berklıdegi Kalıfornııa ýnıversıteti, úzdik úshtikti Manchester ýnıversıteti túıindep tur.

Toqtala ketsek, úzdik oqý oryndarynyń tizimine AQSh-tyń — 209, Ulybrıtanııanyń — 93 jáne Qytaıdyń 90 ýnıversıteti engen. 

Eske salaıyq, buǵan deıin atalǵan reıtıngige Qazaqstannyń 12 joǵary oqý orny kirgenin jazyp edik.