Ózbekstannyń tarıhı matchy: Tashkent jankúıerleri qalaı qoldaý kórsetip jatyr
TAShKENT. KAZINFORM — Ózbekstannyń Álem chempıonatyndaǵy alǵashqy matchy bastaldy. Kolýmbııaǵa qarsy alańǵa shyqqan kórshiles memlekettiń quramasyna qoldaý kórsetý úshin eldiń ár óńirinde uıymdastyrylǵan match tamashalaý alańdaryna jankúıerler jınaldy.
Osy oraıda, Kazinform agenttiginiń Tashkenttegi menshikti tilshisi de jergilikti turǵyndarmen birge ózbek aıaqdopshylarynyń ónerine kýá bolyp, sportshylardy qoldaı kelgendermen tildesti.
Tashkentte arnaıy uıymdastyrylǵan 13 jerde match kórsetilip jatyr. Olardyń ishinde eń úlkeni — «Býnedkor» stadıony. Onda qazirgi ýaqytta 10 myńǵa jýyq jankúıer ózbek fýtbolshylarynyń ónerin tamashalap, qoldaý kórsetip otyr.
Jankúıerlerge arnalǵan taǵy bir iri oryn Jeńis saıabaǵynda ornalasqan. Munda jergilikti turǵyndarmen qatar, sheteldik týrıster de jınaldy.
Adamdar kúndelikti qarbalas tirshilikti bir sátke umytyp, matchty asa joǵary qyzyǵýshylyqpen tamashalap otyr. Onyń ústine búgin barlyq memlekettik organnyń qyzmetkeri jumysyn ádettegiden kesh bastaıdy. Keshe el prezıdenti Shavkat Mırzıeev tarıhı oqıǵaǵa kýáger bolýǵa asyq azamattardyń mekemedegi isine saǵat 9:00–de emes, 10:00–de kirisýine ruqsat berdi.
Jeńis saıabaǵyna jınalǵandardyń júzinen rııasyz qýanysh ańǵarylyp, keýdesin maqtanysh sezimi kernep tur. El quramasynyń qaqpasyna qaraı baǵyttalǵan ár soqqy kezinde jankúıerler tym-tyrys qalyp, qaýipti mezetten ótkennen keıin Tashkent kóshelerin kerneıdiń ásem áýezine bólep jatyr.
Jankúıerler oıyn tamashalaýmen qatar, shaǵyn úzilisterdi tıimdi paıdalanyp, BAQ ókilderine suhbat berip úlgerip jatyr. Djamshıd Ýstanovtyń aıtýynsha, Ózbekstan quramasynyń tuńǵysh ret Álem chempıonatynda óner kórsetýi tarıhı jetistik.
— Bizdiń elimizdiń sporshylary eń úzdik nátıjege qol jetkizdi. Alǵash ret Álem chempıonatynda oıyn kórsetip jatyr. Biz ulttyq quramanyń jankúıeri retinde jeńis tileımiz. Ár qaýipti shabýyl — emotsııaǵa toly sátter. Men el sportshylaryn maqtan tutamyn, olar jastarǵa úlgi, — dedi jankúıer.
Al matchty tamashalap otyrǵan Shýhrat Olımov atap ótkendeı, ózbek fýtbolshylary el namysyn bárinen bıik qoıyp, sátti óner kórsetip jatyr. Onyń sózinshe, ár sportshynyń kózinde jalyn, júreginde jeńiske degen umtylys turǵany ekrannyń arǵy jaǵynan seziledi.
— Búgin dostarymyzben birge Jeńis saıabaǵyna kelip, match kórip otyrmyz. Kóńil-kúı kóterińki, degenmen ishte qobaljý bar. Árıne, Ózbekstan quramasynyń jeńiske jetkenin qalaımyz. Olar bizdiń elimizdiń abyroıy. Ol úshin sportshylardyń erik-jigeri jetedi dep senemin, — dep pikir bildirdi ol.
Baıqaǵanymyzdaı, jankúıerler alańyndaǵy kóńil-kúı de san túrli. Biri qýanyshtan kóz jasyna erik berse, endi biri memlekettik týdy bıik kóterip, án shyrqap jatty. Jınalǵandar bir-birin tanymasa da, ózbek fýtbolshylarynyń ár shabýyly kezinde olar qol alysyp, qushaqtap, arqasynan qaǵyp, bir-birine búkpesiz emotsııa syılap otyr.
Ázirge oıyn esebi — 0:1. Kolýmbııa quramasynyń qorjynynda 1 upaı bar.
Eske salaıyq, Álem chempıonatynyń toptyq kezeńiniń ekinshi týrynda Ózbekstan quramasy Portýgalııamen kezdesedi. Match 23 maýsymda AQSh-tyń Hıýston qalasyndaǵy «NRG» stadıonynda ótedi. Oıyn Astana ýaqytymen saǵat 22:00–de bastalady.
Buǵan deıin Ózbekstan fýtboldan álem chempıonatynyń kollektsııalyq monetasyn shyǵaratynyn jazǵanbyz.
