Ózbekstannyń ishki jalpy ónim kólemi 145 mlrd dollardan asty

TAShKENT. KAZINFORM — Bıyl Ózbekstannyń ishki jalpy ónim kólemi alǵash ret 145 mlrd dollardan asty. Bul týraly jyl qorytyndysy boıynsha halyqqa jáne parlamentke arnaǵan Joldaýynda kórshiles eldiń prezıdenti Shavkat Mırzıeev málim etti, dep habarlaıdy Kazinform agenttiginiń menshikti tilshisi. 

— Bıyl Ózbekstannyń ishki jalpy ónimi tuńǵysh ret 145 mlrd dollardan asty. El eksporty 23%-ǵa artyp, 33,4 mlrd dollarǵa jetti. Sondaı-aq, memleketimizdiń altyn-valıýta qory 60 mlrd dollardan asty. Tikeleı sheteldik ınvestıtsııalar kólemi bıyl 43,1 mlrd dollarǵa teńelip, tarıhı kórsetkishke jetti. Buǵan deıin mundaı nátıjeler bolmaǵan, — dedi Shavkat Mırzıeev.

Ózbekstan basshysy 2030 jylǵa deıin úkimet aldyna ishki jalpy ónim kólemin 160 mlrd dollarǵa deıin jetkizý mindeti qoıylǵanyn aıta kele, atalǵan strategııalyq josparǵa ózgeris engizilgenin málimdedi. Endi resmı Tashkent bul mejege 5 jyldan keıin emes, keler jyly qol jetkizýge múddeli.

— Eger biz daıyn taýar kólemin arttyryp, joǵary tabys ákeletin qyzmetter qataryn kóbeıtip, ozyq aýyl sharýashylyǵy tehnologııalary men sýdy únemdeý ádisterin belsendi qoldansaq, aldaǵy 5 jylda ekonomıkamyzdyń kólemin 240 mlrd dollardan asyrýǵa múmkindik týady, — dep toqtaldy Shavkat Mırzıeev.

Buǵan deıin habarlaǵanymyzdaı, 2026 jyly Ózbekstan úkimeti memlekettik bıýdjettiń 55% áleýmettik salaǵa baǵyttamaq.

Eske salaıyq, 1 qazandaǵy jaǵdaıǵa sáıkes, Ózbekstannyń memlekettik qaryzy 43,9 mlrd dollarǵa jetti.

Buǵan deıin habarlaǵanymyzdaı, Ózbekstan kóleńkeli ekonomıkanyń ishki jalpy ónimdegi úlesin 29%-ǵa deıin tómendetýge nıetti. Taıaýda Ózbekstan ekonomıkasynyń 8,3 mlrd dollardan asa qarajaty kóleńkede qalyp otyrǵanyn jazyp edik. Osylaısha, ol ishki jalpy óniminiń 33,3 paıyzyna teńelip otyr.