Ózbekstannyń Ortalyq banki bazalyq mólsherlemeni ózgerissiz qaldyrdy
TAShKENT. KAZINFORM – Ózbekstan Ortalyq bankiniń Basqarmasy bazalyq mólsherlemeni jyldyq 14% deńgeıinde saqtap qalý sheshimin qabyldady, dep habarlaıdy Kazinform agenttiginiń Tashkenttegi menshikti tilshisi.
Bankten málim etkendeı, naýryzda jyldyq ınflıatsııa 7,1%-ǵa deıin tómendedi. Al bıyl ol shamamen 6,5%-ǵa deıin baıaýlaıdy. Sonymen qatar 2026 jyldyń sońyna qaraı eldiń ishki jalpy ónim kólemi 7-7,5 paıyzǵa deıin ósýi yqtımal.
Alaıda, retteýshi organnan atap ótkendeı, syrtqy táýekelder saqtalyp otyr. Máselen, geosaıası shıelenister, munaı men azyq-túlik baǵasynyń ósýi jáne logıstıkalyq shyǵyndardyń artýy ınflıatsııaǵa qosymsha salmaq túsiredi. Ortalyq bank Basqarmasynyń bazalyq mólsherleme boıynsha kelesi otyrysy 17 maýsymǵa josparlanǵan.
Buǵan deıin habarlaǵanymyzdaı, Azııa damý banki bıyl Ózbekstannyń ishki jalpy ónim kólemi 6,7%-ǵa ósetinin boljap otyr.
Eske salaıyq, 2025 jyldyń qorytyndysy boıynsha Ózbekstannyń memlekettik qaryzy 6,6 mlrd dollarǵa ósip, 46,8 mlrd dollarǵa teńeldi.
Sonymen qatar byltyr Ózbekstannyń ishki jalpy ónim kólemi alǵash ret 145 mlrd dollardan asty.
Sondaı-aq Dúnıejúzilik banktiń boljamyna sáıkes, 2026 jyly Ózbekstannyń ishki jalpy ónim kólemi 6 paıyzǵa ósedi. Bıyl Ózbekstan úkimeti memlekettik bıýdjettiń 55% áleýmettik salaǵa baǵyttamaq.
