Ózbekstannyń Ortalyq banki bazalyq mólsherlemeni kóterdi

TAShKENT. KAZINFORM – Ózbekstan Ortalyq bankiniń basqarmasy mólsherlemeni jyldyq 0,5 paıyzǵa kóterý sheshimin qabyldady, dep habarlaıdy Kazinform agenttiginiń menshikti tilshisi.  

Aıta keteıik, buǵan deıin Ózbekstanda bazalyq mólsherleme 13,5% deńgeıinde bolǵan edi. Tıisti sheshim ınflıatsııa táýekelderiniń saqtalýyna jáne suranys kóleminiń artýyna baılanysty qabyldanyp otyr. 

Ortalyq bankten atap ótkendeı, jyl basynan beri janarmaı, kommýnaldyq tólem, kólik, bilim berý jáne medıtsınalyq qyzmetter baǵasy ósti. Máselen, aqpanda júrgizilgen saýalnama nátıjesine saı, halyq ınflıatsııany 15,3% deńgeıinde dep baǵalasa, kásipkerler onyń mólsheri 13,8% shamasynda ekenin alǵa tartýda.

— Inflıatsııany tejeý jáne suranys pen usynys arasyndaǵy teńgerimdi saqtaý aqsha-nesıe saıasatynyń sharttaryn qatańdatýdy talap etedi, - delingen Ortalyq banktiń habarlamasynda.

Eske salaıyq, keıingi ret Ózbekstannyń Ortalyq banki byltyr qazanda bazalyq mólsherlemeni 13,5% deńgeıinde saqtap qalý sheshimin qabyldaǵan edi.

Qosa ketsek, bıyl 7 naýryzda QR Ulttyq banki bazalyq mólsherlemeni 16,5%-ǵa deıin kótergen bolatyn.