Ózbekstannyń memlekettik organdary syılyqtar týraly aqparatty jarııa etýge mindettelýi múmkin
ASTANA. KAZINFORM – Ózbekstanda memlekettik organdar men uıymdardyń jarııa etýi tıis áleýmettik mańyzdy derekter tizimin keńeıtý qarastyrylyp otyr, dep habarlaıdy Kazinform agenttigi.
Prezıdent jarlyǵynyń tıisti jobasy qoǵamdyq talqylaýǵa shyǵaryldy.
Qujatqa sáıkes, memlekettik organdar men uıymdar qyzmetkerleriniń jumys issaparlary kezinde alǵan syılyqtary týraly toqsan saıyn aqparat jarııalaýǵa mindetti bolýy múmkin. Bul rette qyzmetkerdiń zańǵa sáıkes óz qalaýy boıynsha ıelik etýge quqyǵy bar syılyqtarǵa erekshelik jasalady. Memlekettik qyzmetkerler sheteldik saparlar men halyqaralyq is-sharalar kezinde syılyqtardy qabyldaı alatynyn, biraq olardyń quny 1,648 mln sýmnan (shamamen 67 myń teńge) aspaýy tıis ekenin atap ótken jón.
Sondaı-aq, memlekettik organdar men uıymdar alǵan demeýshilik jáne qaıyrymdylyq kómek, sonyń ishinde aqsha, múlik, qyzmetter jáne basqa da qoldaý túrleri týraly aqparatty jarııalaý usynylyp otyr.
Budan basqa, memlekettik organdar men uıymdar alǵan demeýshilik jáne qaıyrymdylyq kómek, sondaı-aq memlekettik kásiporyndar men 50% nemese odan da kóp memlekettik úlesi bar kompanııalar aýdarǵan qarajat týraly toqsan saıynǵy aqparatty jarııalaý usynyldy.
Bul aqparatty resmı saıttar jáne ashyq derekter portalynda únemi jarııalaý josparlanyp otyr.
