Ózbekstannyń memlekettik qaryzy 47 mlrd dollarǵa jýyqtady
TAShKENT. KAZINFORM – Bıyl birinshi toqsannyń qorytyndysy boıynsha Ózbekstannyń memlekettik qaryzy 46,9 mlrd dollarǵa teńeldi, dep habarlaıdy Kazinform agenttiginiń Tashkenttegi menshikti tilshisi.
Ekonomıka jáne qarjy mınıstrliginiń esebine saı, jalpy somanyń 39,7 mlrd dollary syrtqy qaryz, al 7,2 mlrd dollary ishki bereshek. Osylaısha, eldiń jıyntyq memlekettik qaryzy ishki jalpy ónimniń 26,6 paıyzyna teńeldi.
Qazirgi ýaqytta respýblıkaǵa kóp nesıe bergen halyqaralyq qarjy uıymdarynyń kóshin Dúnıejúzilik bank bastap ($9,04 mlrd) tur. Odan keıin tizimde Azııa damý banki ($8,28 mlrd), Azııa ınfraqurylymdyq ınvestıtsııalar banki ($2,28 mlrd), Qytaı eksport-ımport banki jáne osy eldiń ózge de uıymdary ($3,9 mlrd) jaıǵasqan.
Buǵan deıin habarlaǵanymyzdaı, bıyl Ózbekstan DSU-nyń teń quqyly múshesi atanýǵa nıetti.
Sonymen qatar taıaýda Ózbekstannyń Ortalyq banki bazalyq mólsherlemeni ózgerissiz qaldyrdy.
Eske salaıyq, Samarqandta ótken Azııa damý banki Basqarýshylar keńesiniń 59-shy otyrysynda Shavkat Mırzıeev jahandyq qaqtyǵystar OA elderi úshin júk tasymaly qunynyń 30%-ǵa deıin ósýine sebep bolyp jatqanyn aıtty.
