Ózbekstannyń Qazaqstanmen shekarasynda kontrabandaǵa arnalǵan jasyryn týnnel tabyldy
TAShKENT. KAZINFORM – Ózbekstanda úndistandyq dári-dármekterdi Qazaqstan arqyly elge tasymaldaýmen aınalysqan transshekaralyq qylmystyq toptyń qyzmeti áshkere boldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Jedel is-sharany Memlekettik qaýipsizdik qyzmetiniń shekara áskerleri jáne Keden komıtetiniń "Tashkent-Aero" mamandandyrylǵan keden kesheniniń qyzmetkerleri ótkizdi.
Onyń barysynda dári-dármekterdiń kezekti partııasy Delıden Almatyǵa Tashkent arqyly tranzıtpen jetkizilip, keıin Qazaqstannyń Saryaǵash aýdanyndaǵy Dostyq aýylyna ákelingeni anyqtaldy. Odan soń kontrabandalyq taýarlar ári qaraı qupııa týnnel arqyly Tashkent oblysyndaǵy Ýrıkzor mahallasyna ákelingen.
Uzyndyǵy 310 metr bolatyn týnnel 1975 jylǵy Ýrıkzor mahallasyndaǵy turǵynnyń úıinen tabyldy. Jerasty ótkeli jaryq jáne jeldetý júıelerimen jabdyqtalǵan. Sonymen qatar, ol jerden júkti tasymaldaýǵa arnalǵan arba men arqandar tabyldy.
Ózbekstan Memlekettik qaýipsizdik qyzmetiniń aqparatynsha, qylmystyq toptyń múshelerinen jalpy quny 1 mlrd sýmnan (37,5 mln teńge) asatyn sapasy tekserilmegen úndistandyq dári-dármek tárkilendi.
Qazirgi ýaqytta atalǵan fakti boıynsha qylmystyq is qozǵalyp, birneshe kúdikti ustaldy.
