Ózbekstannyń Qazaqstandaǵy elshisi taǵaıyndaldy
TAShKENT. KAZINFORM – Bahtıer Ibragımov Ózbekstannyń Qazaqstandaǵy Tótenshe jáne ókiletti elshisi bolyp taǵaıyndaldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstannyń Syrtqy ister mınıstrligine qarasty Dunyo aqparat agenttiginiń málimetinshe, Bahtıer Ibragımov búginnen bastap óz qyzmetine kiristi. 51 jastaǵy jańa elshi Tashkent memlekettik Shyǵystaný ýnıversıtetin jáne Búkilreseılik syrtqy saýda akademııasyn támamdaǵan.
Eńbek jolyn 1994 jyly Ózbekstannyń syrtqy ekonomıkalyq baılanystar mınıstrliginiń (qazirgi Investıtsııalar, ónerkásip jáne saýda mınıstrligi) ortalyq apparatynda jetekshi maman bolyp bastaǵan. Keıin bas maman, mınıstrdiń kómekshisi jáne basqarma bastyǵy laýazymdaryna deıin kóterilgen.
2001 jyly Ózbekstannyń AQSh-taǵy elshiliginde birinshi hatshy, ári qaraı saýda-ekonomıkalyq máseleler jónindegi keńesshi bolǵan.
Odan soń Bahtıer Ibragımov Syrtqy ekonomıkalyq baılanystar mınıstrligi janyndaǵy ekonomıkalyq qurylymdarda túrli laýazymdarda jumys istegen, Mınıstrler Kabınetiniń sektor meńgerýshisi laýazymyn ıelengen.
2019-2022 jyldary Ózbekstannyń Birikken Arab Ámirlikterindegi elshisi, SІM departamentiniń dırektory, ÓR Týrızm jáne mádenı mura mınıstriniń orynbasary bolyp eńbek etti.
Bahtıer Ibragımov 2018-2024 jyldar aralyǵynda Ózbekstannyń Qazaqstandaǵy elshisi bolǵan Saıdıkram Nııazhodjaevtyń ornyn basty.
