Ózbekstannyń eki aýyly Qyrǵyzstan quramyna kiretin boldy
ASTANA.KAZINFORM - Memlekettik shekarany belgileý aıasynda Ózbekstan eki eldi mekenin Qyrǵyzstanǵa berdi, dep habarlaıdy Kazinform agenttiginiń Bishkektegi tilshisi.
Bul týraly Qyrǵyzstan prezıdentiniń baspasóz hatshysy Asqat Alagózov málimdedi.
Onyń aıtýynsha, buryn Ózbekstannyń Ferǵana oblysynyń quramynda bolǵan Chongara jáne Tash-Tobo aýyldary Qyrǵyzstan quramyna endi. Bul aýyldarda shamamen 2500 etnıkalyq qyrǵyz turady. Tirkeý aıaqtalǵannan keıin olarǵa Qyrǵyzstan azamattyǵy beriledi.
Bul eldi mekenderdiń ornyna Bishkek shekara aımaǵynda Tashkentke teń kólemdegi jer ýchaskelerin berdi.
Taraptar sondaı-aq 236 gektar teń aýmaqty almastyrdy. Bul Qyrǵyzstanǵa Saı aýylynan Taıan aýylyna tikeleı jol salýǵa múmkindik beredi. Jańa baǵyttyń arqasynda Batken oblysynyń turǵyndary Aıdarkennen Batkenge osy aýyldar arqyly tikeleı bara alady, bul joldy 225 shaqyrymnan 55 shaqyrymǵa deıin qysqartady.
Buǵan deıin Qyrǵyzstan men Ózbekstan taýar aınalymyn 2 mlrd dollarǵa deıin arttyrýdy kózdep otyrǵanyn habarlaǵan edik.
