Ózbekstannyń DSU-ǵa qosylý protsesi keshigýi múmkin

TAShKENT. KAZINFORM – Ózbekstannyń Dúnıejúzilik saýda uıymyna qosylý protsesi keshigýi yqtımal. Bul týraly el prezıdentiniń DSU máseleleri jónindegi arnaıy ókili Azızbek Ýrýnov málim etti, dep habarlaıdy Kazinform agenttiginiń Tashkenttegi menshikti tilshisi.

— Keıbir elder qujattardy qaraý isin baıaý júrgizip jatyr. Biz jeltoqsanda osyǵan qatysty alańdaýshylyq bildirip, protsesti keshiktiretin memleketter bar ekenin aıttyq. Olardy atap aıtý orynsyz bolar. Degenmen mundaı elder bar jáne biz búginde olarmen kelissózder júrgizip jatyrmyz, - dedi Azızbek Ýrýnov BAQ ókilderine arnalǵan baspasóz maslıhatynda.

Onyń paıymynsha, eger másele tek Ózbekstanǵa baılanysty bolsa, onda el uıymǵa naýryz aıynda qosylýǵa daıyn bolatyn edi.

Buǵan deıin resmı Tashkent bul protsesti bıyl naýryzda Kamerýnda ótetin DSU mınıstrler konferentsııasynyń 14-shi otyrysyna deıin aıaqtaýdy josparlaǵan.

Eske salaıyq, ózbek tarapy byltyr 40-tan astam kelissóz júrgizip, EO, Qytaı, Reseı, Ulybrıtanııa, Shveıtsarııa, Kanada, Avstralııa jáne ózge de eldermen tıisti kelisimderge qol qoıdy.