Ózbekstannyń burynǵy TÚKSh mınıstri 7 jylǵa sottaldy

ASTANA. KAZINFORM – Aǵymdaǵy jyldyń naýryz aıynda Shaıhantahýo aýdanynyń Qylmystyq ister jónindegi soty 2021-2023 jyldar aralyǵynda Nýrafshan qalasynyń hokımi jáne 2017-2021 jyldary turǵyn úı-kommýnaldyq sharýashylyq mınıstri qyzmetin atqarǵan Muzaffar Salıevke úkim shyǵarǵan, dep habarlaıdy uznews. 

Іs materıaldaryna sáıkes, sottalýshy jalpy somasy 5 mln dollardan astam bıýdjet qarajatyn urlaýdyń birneshe isi boıynsha aıyptalǵan.

Sot burynǵy mınıstrdi ÓR Qylmystyq kodeksindegi 167-baptyń 3-bóliminiń «a, v» tarmaqtarynda (Uıymdasqan toptyń asa iri mólsherde nemese onyń múddesin kózdep ıemdený nemese ysyrap etý jolymen jasalǵan urlyq) jáne 209-baptyń 2-bóliminiń «a, b» tarmaqtarynda (Qaıta jasalǵan laýazymdyq jalǵandyq nemese qylmysyn qaıtalap jasaýshynyń uıymdasqan toptyń múddesi úshin qaıta jasaǵan laýazymdyq jalǵandyq) qarastyrylǵan qylmystardy jasaǵany úshin kináli bolyp tanyldy. Ol 7 jyl bas bostandyǵynan aıyrý jazasyna kesildi.

Tashkent qalalyq soty Muzaffar Salıevtiń bul úkimge qatysty shaǵymyn qarady.

Advokattar apellıatsııalyq shaǵymda birinshi ınstantsııaly sot M.Salıevti uıymdasqan top quramynda aqsha ıemdený jáne jalǵan qujat jasaý qylmystaryn jasady dep negizsiz aıyptaǵanyn kórsetti. Sot istiń mán-jaıyn tolyq teksermeı, M.Salıevti mınıstr laýazymynda bolmaǵan kezeń úshin aıyptady dep shaǵym túsirgen.

Sot alqasy sýdıanyń baıandamasyn, prokýrordyń qorytyndysyn, sondaı-aq sottalýshy men onyń qorǵaýshylarynyń pikirin tyńdap, qylmystyq is materıaldarymen qosa shaǵymdardyń dálelderin taldap, úkimdi ózgerissiz qaldyrý týraly sheshim qabyldady.