Ózbekstannyń burynǵy aýyl sharýashylyǵy mınıstrine qatysty sot úkimi shyqty

TAShKENT. KAZINFORM – Qylmystyq ister jónindegi Mırabad aýdandyq soty Ózbekstannyń burynǵy aýyl sharýashylyǵy mınıstri Azız Voıtovqa qatysty iske núkte qoıdy, dep habarlaıdy Kazinform agenttiginiń menshikti tilshisi.

Úkimge sáıkes, eks-mınıstr qylmystyq kodekstiń 167-baby 3-bóligi boıynsha («Asa iri mólsherdegi qarajatty zańsyz ıemdený nemese jymqyrý») kináli dep tanyldy. Shyǵyndardyń tolyq ótelgenin eskere otyryp, oǵan 3 jyl merzimge túzeý jumystaryna tartý jazasy taǵaıyndalyp, 400 bazalyq eseptik shama (7,1 mln teńge) mólsherinde aıyppul salyndy. Sonymen qatar, ol 3 jyl basshylyq laýazymdaǵy qyzmetterdi atqarý quqyǵynan aıyryldy.

Toqtala keteıik, eks-sheneýnik 2023 jyly qazanda qyzmetinen bosatylyp, sol jyldyń jeltoqsanynda qamaýǵa alynǵan bolatyn. Oǵan qatysty sot otyrysy byltyr 5 qyrkúıekte bastalǵan.

Azız Voıtov 2020 jyldyń naýryzynan bastap Investıtsııalar jáne syrtqy saýda mınıstriniń birinshi orynbasary laýazymynda eńbek etti. Keıin, ıaǵnı 2022 jyldyń tamyzynan 2023 jyldyń qazanyna deıin Ózbekstannyń Aýyl sharýashylyǵy mınıstri qyzmetin atqardy.

Eske salaıyq, byltyr Ózbekstanda qylmystyq jaýapqa tartylǵan laýazymdy tulǵalardyń sany 37,2%-ǵa ósti. Tıisinshe, jemqor sheneýnikter memleketke $278,3 mln zalal keltirdi.

Buǵan deıin habarlaǵanymyzdaı, Ózbekstanda jemqorlyqqa beıim keletin sheneýnikterdi erte anyqtaý tájirıbesi engizilmek.

Sonymen qatar, byltyr kórshiles elde ekonomıkanyń damýyna selqos qaraǵan 300-ge jýyq sheneýnik jumystan bosatyldy. Munymen birge, Ózbekstanda ınvestıtsııa tartý isinde olqylyqqa jol bergen birqatar joǵary laýazymdy sheneýnik qyzmetin bosatqan bolatyn.

Sondaı-aq, bıyl naýryzda Ózbekstan prezıdenti jemqorlyqpen kúreske jaýapty 117 sheneýnikti qyzmetinen bosatýdy tapsyrǵan bolatyn.