Ózbekstannyń barlyq mınıstrligi Jańa Tashkent aýmaǵyna kóshirilmek
TAShKENT. KAZINFORM – Ózbekstannyń atqarýshy bıligi shahardyń jańadan salynyp jatqan Jańa Tashkent aýmaǵyna kóshiriledi.
Bul týraly prezıdent Shavkat Mırzıeev qol qoıǵan «Memlekettiń ekonomıkaǵa qatysýyn qysqartý jónindegi qosymsha sharalar» jarlyǵynda jazylǵan, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Prezıdent Shavkat Mırzıeev premer-mınıstr Abdýlla Arıpov bastaǵan Jańa Tashkent aýmaǵynyń qurylysyn úılestirý keńesine 3 aı ishinde memlekettik organdardy kóshirý týraly tapsyrma berdi.
Sonymen qatar, atalǵan keńes músheleri mınıstrlikterdiń qazirgi ǵımarattaryn tıimdi paıdalaný jáne nysandardy satyp, odan túsken qarajatty Jańa Tashkenttegi qurylys jumystaryna baǵyttaý boıynsha Ózbekstan basshysyna usynys engizýi kerek.
Aıta keteıik, Jańa Tashkenttiń qurylysy byltyr naýryzda bastaldy. Ol tolyq aıaqtalǵannan keıin, josparǵa saı, qala mıllıonǵa jýyq turǵyndy qabyldaı alady.
Jańa Tashkentte memlekettik mekemeler, joǵary oqý oryndary jáne basqa da nysandar ornalaspaq.