Ózbekstannyń altyn valıýta rezervteri rekordtyq deńgeıge ósti

TAShKENT. KAZINFORM – Bıyl qańtarda Ózbekstannyń halyqaralyq rezervteri men altyn valıýta qory ósip, rekordtyq kórsetkishke jetti, dep habarlaıdy Kazinform agenttiginiń menshikti tilshisi.

1 aqpandaǵy málimetke saı, Ózbekstan Ortalyq bankiniń rezervindegi aktıvterdiń jalpy quny 42,9 mlrd dollarǵa jetti. Bul 2024 jyldyń jeltoqsan aıyndaǵy kórsetkishpen salystyrǵanda 1,72 mln dollarǵa (4,17%) kóp.

Ortalyq bank qoımalarynda saqtaýly turǵan altynnyń baǵasy 3,02 mlrd dollarǵa kóterilip, 35,06 mlrd dollarǵa teńeldi. Bul 2013 jyldan beri tirkelgen eń joǵary kórsetkish sanalady.

Sonymen qatar, eldegi altynnyń kólemi 12,3 mln-nan (382,57 tonna) 12,6 mln ýntsııaǵa (391,9 tonna) deıin ulǵaıdy.

Sarapshylardyń paıymynsha, ósimge álemdik naryqtaǵy qymbat metal baǵasynyń kóterilýi yqpal etti.

Eske salaıyq, 2023 jyldyń 11 aıynda Ózbekstan 8,15 mlrd dollarǵa baǵalanǵan altyndy eksporttaǵan. Bul 2022 jylmen salystyrǵanda 2,3 ese kóp jáne óz kezeginde rekordtyq kórsetkish sanalady.

Sonymen qatar, 2023 jyly qazan jáne qarasha aılarynda Ózbekstan altyndy kóp satqan elderdiń kóshin bastaǵan bolatyn.