Ózbekstannyń altyn-valıýta qory 1,1 mlrd dollarǵa qysqardy

TAShKENT. KAZINFORM – Bıyl maýsymda Ózbekstannyń halyqaralyq rezervteri men altyn valıýta qory 1,1 mlrd dollarǵa kemidi, dep habarlaıdy Kazinform agenttiginiń menshikti tilshisi.

1 shildedegi málimetke saı, Ózbekstan Ortalyq bankiniń rezervindegi aktıvterdiń jalpy quny 48,5 mlrd dollarǵa baǵalanǵan. Budan bir aı buryn, ıaǵnı mamyrdyń qorytyndysy boıynsha kórshiles eldiń altyn valıýta qory 49,6 mlrd dollarǵa baǵalanyp, rekordtyq kórsetkishke jetken.

Bul rette shetel valıýtasyndaǵy rezervter 11,4 mlrd dollardan 9,5 mlrd dollarǵa deıin azaıdy.

Al qamtylyp otyrǵan aralyqta Ortalyq bank qoımalarynda saqtaýly turǵan altynnyń baǵasy 763 mln dollarǵa qymbattap, 38,4 mlrd dollarǵa teńeldi.

Sonymen qosa, eldegi altynnyń kólemi 11,4 mıllıon ýntsııadan (323,18 tonna) 11,7 mıllıon ýntsııaǵa (331,68 tonna) deıin ulǵaıdy.

Eske salaıyq, bıyl qańtarda Ózbekstannyń halyqaralyq rezervteri men altyn valıýta qory ulǵaıyp, rekordtyq kórsetkishke jetken edi.

Sondaı-aq, 2023 jyldyń 11 aıynda Ózbekstan 8,15 mlrd dollarǵa baǵalanǵan altyndy eksporttady. Bul 2022 jylmen salystyrǵanda 2,3 ese kóp jáne óz kezeginde rekordtyq kórsetkish sanalady.