Ózbekstannan tabylǵan ınsýlınge qatysty tekserý jalǵasýda
«Iá, biz bul másele boıynsha Ulttyq qaýipsizdik komıtetine ótinish bergen bolatynbyz. Olar qazirgi ýaqytta atalǵan preparattyń sol jaqqa ótkizilip ketýine baılanysty tergeý jumystaryn júrgizip jatyr. Ol preparattardy, shynymen, kepildendirilgen tegin medıtsınalyq kómek kórsetý úshin «SK-Farmatsııa» alǵan bolatyn. Bul preparattar - 2018 jyly satyp alynǵan serııa edi», - dedi Lıýdmıla Bıýrabekova OKQ-da ótken baspasóz máslıhatynda.
Lıýdmıla Bıýrabekovanyń aıtýynsha, sondaı-aq Densaýlyq saqtaý mınıstrliginiń aýmaqtyq departamentteri de Ulttyq bıýromen birge óz tekserýin júrgizýde.
«Tekserý jumystary áli aıaqtalǵan joq. Onyń nátıjesi belgili bolǵannan keıin biz birden osy másele boıynsha habarlama beretin bolamyz», - dedi farmatsııa komıtetiniń tóraıymy.
Eske sala ketsek, ótken aıda Qazaqstan azamattaryna arnalǵan ınsýlındi Ózbekstanǵa satý faktisi boıynsha prokýratýra tekserý júrgize bastaǵan bolatyn.
«Bul máselede tıisti aqparatty alý úshin tıisti saýaldy joldadyq. Atalǵan fakti boıynsha taldaý júrgizilýde. Sondyqtan da bul aqparat rastalsa, onda tıisti sharalar qabyldanady», - dedi Bas prokýrordyń orynbasary Andreı Lýkın.
Arada kóp ótpeı QR Densaýlyq saqtaý mınıstrligi farmatsııa komıtetiniń tóraǵasy Lıýdmıla Bıýrabekova qazaqstandyqtarǵa arnalǵan ınsýlınniń Ózbekstanda satylyp jatqanyna baılanysty túsinik bergen edi.
